Pynlong jingialang ka NPP ha Madan IingSyiem ban pan jingkyrshan ia u kyrpng MP

Ka NPP Mylliem Block ha ka sngi Palei ka la pynlong ia ka jingialang paitbah ha Madan Ïingsyiem, Mylliem, ha kaba da ki hajr ngut ki paitbah kila wan ban iashim bynta bad ki nongialam ka NPP kila kyrpad ia ki paitbah ban ai jingkyrshan pura bad ban pynjop don burom ia u Dr DRL Nonglait u Kyrtong ka NPP uban iakhun ia ka elekshon shiteng samoi jong ka MP Lok Sabha na Shillong Parliamentery Constituency.

Haba kren ha ka jingialang u President ka NPP Meghalaya u Bah Prestone Tynsong ula kyntu ia ki paitbah ba kin ai ka jingkyrshan kaba pura ia ka seng NPP khamtam ban jied ia u Dr Nonglait kum u MP ban pynkhlain shuh shuh ia ka NPP kaba dei ka National Party ha ka ri.

U Bah Prestone ula ong, ba ka seng NPP hapoh ka jingialam u Conrad K Sangma ula leit ialam ia ki seng sain pyrthei bad ia ki nongialam sengbhalang ban iakynduh ia ki Myntri ka Sorkar Pdeng ban iakren halor ka CAB ban pyllait na ka jingpyntreikam ha ki jaka kiba hap hapoh kaj ingkhmih jong ka Sixth Schedule.

Ula ong ruh ha kaba iadei abd kaj ingthmu ka sorkar pdeng ban pynkylla ia ki kydnon jong ka FCRA, ka NPP hapoh ka jingialam u Conrad K Sangma ula leit ialam ia ki nongialam Niam ban iakynduh ia u Myntri Kam Pohiing ka ri u Amit Shah ban iakren halor ka jingpynkylla ia ka FCRA bad hadien ka jingiakren, ka Sorkar Pdneg kala phah noh ia kane ka kam sha ka Joint Parliamentary Committee ba kin bishar biang.

U Bah Prestone ula iathuh ruh ba u Conrad Sangma ula leit ban iakynduh ia u Lamphang ka iingdorbar thawaiñ ka ri halor ka jingbym don nongmihkhmat na ka thain shatei lammihngi ha katei ka Committee bad kaba sngewtynnad ka long ba u Lamphang ula thung ia u MP Rajya Sabha ba marwei ka Jylla Meghalaya u James PK Sangma kum u dkhot jong katei ka Committee bad u James Sangma ula ioh ban mihkhmat marwei ia ka thaiñ shatei lammihngi sha ka JPC.

Katba u kyrtong MP ka NPP u Dr DRL Nonglait ula ong, mynta ka don ka jingkhih phaloh, ka jingiasaphred bad ka jingiapra hynrei ula khot ban lum lang ia baroh ban ai ka jingkyrshan ia ka Liang Synshar kaba dang sah ban shakri sa 2 snem shiteng khnang ba yn lah ban wanrah ia ki jingkylla.

Ula kyntu ruh ba dei ban sangeh noh ia ka jingwad daw ne jingia kynnoh bad lada lah ia bakla ha ki por kiba lah dep mynta dei ban ia wanlang ban iatreilang ban im ka ri bad ka jaidbynriew.

Katba u Treasurer bad Political Secretary jong u Myntri Rangbah ka Jylla u Bah Daniel

Thangkhiew, ula ong ba ha kine ki sngi kila jur ki jingpynsaphriang ia ki khubor lamler ba ka sorkar kan sa khyllem, hynrei ula ong, ba ki nongialam ka NPP ki iatylli bad kila pynshai ruh halor ka jingmih kine ki khubor hamsaia.

Ula ong, dang shen ki MLA ka NPP kila iakynduh lang ha ka iingsah u Myntri Rangbah bad ym shim la don mano mano ruh kiba don jingmut ban mih noh na ka seng.

U Bah Daniel ula ong, ba ka NPP ka long kaba donbok shisha ban ioh ia u kyrtong MP da u Dr Nonglait uba long u briew uba shemphang uba la shakri bha ha kaba iadei bad ka pule puthi, uba sheptieng ia u Blei bad ruh uba shakri ha ki kam u Blei.

Ha kane ka jingialang la iadonlang ka MDC jong ka Nongshken ka Kong Grace Mary Kharpuri, u MLA barim ka Mylliem bad u Working President ka NPP u Bah Hamletson Dohling, u Nongaiktien ka seng NPP u Bah HM Shangpliang bad kiwei kiwei ki nongkitkam jong ka NPP ryngkat ka jingwan iashimbynta lang jong ki hajar ngut ki paitbah.