Ka BJP ka thrang ban thaw sorkar ha Meghalaya, tip ma ki ia ka daw

U President ka Voice of the People Party (VPP) u bah Ardent Miller Basaiawmoit ula kam ba ka BJP kan ym lah ban bsuh khlieh ha kane ka jylla Meghalaya kumba ka la pyrshang ha man ki ilekshon.
Haba kren sha ki lad pathai khubor ha ka sngi Saitjain, u bah Ardent ula ong kumba ka paw ha kine ki sngi, ka BJP ka la kthong tyngeh ban ioh kurup ia ka bor ha ka jylla Meghalaya khnang ban pynurlong ia ki jingkwah jong ka hynrei ha ki ilekshon ki paidbah ki kyntait.
“Ka BJP ka thrang dik dik ban ioh thaw ia ka sorkar ha jylla Meghalaya bad ia ka daw tip tang ma ki bad nga tikna ba ki paidbah ka jylla ki dang kyntait ia ka BJP ha ka ilekshon MLA,” ong u bah Ardent.
Halor ka jingrung jong ki 8 ngut ki MLA ka UDP sha ka BJP dang shen, u bah Ardent ula ong ba ka BJP kan ym lah ban pyniar ia ka thapniang jong ka ha kane ka jylla bad ula ong ba ka jingioh ka BJP ia ki MLA ka dei da kaba rung na kyrpong iing, ym na ka lynti ba dei na u paidbah.
“Ka BJP ka lah ban mynjur ia ki katto katne ki jingdawa ki MLA ka UDP hynrei ngam iohi ba ka BJP kan pdiang ia kito ki jingdawa kiba lah ban ktah pyrshah ia ka party BJP,” ong u President ka VPP.
Haba ia dei bad u Uranium u bah Ardent ula ong ba kumba ula kren hapoh ka iing dorbar ba un eng pyrshah beit ia ka jingtih uranium. Lada ka sorkar India ka iaid skahmat ban tih jubor ia u uranium, ka jingiakhun jong u, kan long haduh ka jingiap syndon.