Phi la ai lad ia ka Congress bad Seng Riewlum, ai lad sa ka BJP ban synshar ha Jylla: Bah Sanbor

U Myntri Sorkar bad nongialam ka BJP u Bah Sanbor Shullai ula kyrpad ia ki nongthep vote ban ailad noh ia ka BJP ban ioh ia ka bor synshar kaba 5 snem ha ka elekshon MLA kaban long ha u 2028 bad ka kular ba lada ka BJP kam lah ban ai ia ka roi ka par, ki lah ban kyntait noh ia ka ha ka elekshon ban wan.
U Bah Sanbor ula ong ba ka jylla Meghalaya ka lah dep ailad ia ka seng Congress bad ia ki seng riewlum ia ka kabu ba kin synshar bad mynta kala dei ka por ban ailad noh ia ka BJP ban ialam ia ka Sorkar Jylla.
“Ai ia ka BJP tang 5 snem. Phi lah dep ai ia ka Congress bad ia ki seng riewlum ia ka kabu ban ialam ia ka jylla. Lada ngi pulom, phi lah ban kyntait noh ia ngi ha ka elekshon ban wan” ong u Bah Sanbor haba ai jingkren ha kawei ka jingialang kaba la long dang shen ha Mawlai.
U la kyntu ba ia ki kam pynroi la sakhi hapoh ka sorkar pdeng kaba la ialam da ka BJP ha kine ki 12 snem kiba lah dep bad ka seng kala pyni ia ka jinglah ka jongka ban wanrah ia ki jingkylla bad kumta ka Meghalaya
kan ioh ia kiba bun ki jingmyntoi lada ka BJP ka wan ha ka bor.
“Mutdur kaei kaban jia lada don ia ka sorkar BJP ha Meghalaya,” ula ong bad ka kyntu ia ki paitbah ban ailad ia ka seng ha ka elekshon MLA ha u snem 2028.
U la ong, ba ka BJP kadei hok ban ioh ia ka kabu ban ialam ia ka sorkar ha Meghalaya bad ki paitbah kidei ban bishar ia ka rukom treikam bad ka jingai jingshakri ka jongka ha ki 5 snem bad lada ka leh bha dei ruh ban ailad biang sa 5 snem ia ka BJP ban ialam ia ka Sorkar Jylla.
U Bah Sanbor Shullai ula pynpaw ruh ba ka BJP kala nang khlain bor hapoh ka ïing dorbar thawaiñ na ka jingdon 2 ngut ki MLA mynta kala don 10 ngut ki MLA hadien ka jingwan pyniasoh noh jong ki 8 ngut ki MLA ka UDP, hynrei ula ong pat, ba ka seng ka donkam ban ioh ia ka jingkyrshan kaba pura na ki paitbah ka jylla Meghalaya ba kin ailad ia ka BJP ba kan ioh ia ka bor ban synshar ia ka jylla. Haba pynshai halor ki jingkynnoh ba ka BJP kadei kaba ialeh pyrshah ia ki Khristan, u Bah Sanbor ula kyntu ia ki paitbah ba kim dei ban shah ialam bakla bad kane kadei tang ka buit ban pynthohbria ia ka seng. U la pynkynmaw ba ha ka por ba u iakhun ia ka elekshon MLA ha u snem 2018 na ka BJP, la pynsaphriang ia ki khubor thok, ba ha kane ka elekshon kan lam sha ka jingkhang khyrdep ne jingthang ia ki iingmane bad lada lap ia ki briew kiba bam doh masi kin shah thombor ha ki nongkyrshan.
“Phi lah ju iohsngew ia kum kitei ki jingjia kiban jia ha ka constituency jong nga?” ula buh jingkylli bad ka ong ba ka South Shillong Constituency kadei kaba shongsuk shongsaiñ naduh ba ki paitbah kila jied ia u kum u MLA.