Pynskhem ka HNYF ia ka snat treikam ha shnong Umtrai

Ki Nongïalam ba hakhmat ka Hynñiew Trep National Youth Front (HNYF) Northern Region, hynnien ka sngi ka 10 tarik Risaw, ki la ioh ban pynbam smai bad pynskhem noh ïaki nongkitkam kiba thymmai jong Umtrai Circle haka jingialang kaba la pynlong ha ka shnong Umtrai.
Ha kane ka jingialang tian smai la iadonlang u bah Alfred Malai secretary ka HNYF Northern Region, U Bah Don Roi Kshiar Education Secretary, Shining Kyntla Finance secretary HNYF Northern Region lem bad ki dkhot ka HNYF Northern Region.
Ki Nongkitkam kiba thymmai jong ka Umtrai Circle kiba la shah pynskhem ki kynthup ia u bah Shanbok Suphai kum u President, bah Spen Matlai bad u bah Drepson Lyngkring kum ki Vice President, bah Flaming Umbah General secretary, Bah Martar Lyngkring Assistant Secretary lem bad kiwei kiwei ki Nongkitkam bad ki dkhot.
Haba kren ha katei ka jingialang u Bah Alfred Malai, Secretary ka HNYF Northern Region u la pynkynmaw ïa ki Nongkitkam bad ki dkhot kiba thymmai ka Umtrai Circle halor ki nongrim treikam jong ka seng hakaba u la ioh ban pynkynmaw ruh ia ki mat ki jura kiba ka seng ka la ju ialeh naduh ki por kiba mynshwa.
Shuh shuh u la ong, ba kane ka sngi kan long ka sngi sah jingkynmaw naka bynta ka HNYF hakaba la ioh ban pyn ïar ïaka shnat treikam jong ka seng shaduh ki shnong kiba kham kyndong ka ban peit perman naka bynta la shnong suk shong shngaiñ ha kane ka thaiñ.
Khatduh, U bah Malai U la kyntu ïaki Nongkitkam bad ki dkhot la Umtrai Circle ba kin don iaka mynsiem ban ieid iaka jaidbynriew bad ba kin don ruh iaka jingkitkhlieh khnang ba kin long kiba shemphang haka kam.