Khlad hashen u nongniah na ka jingtakhuh ki trok

U wei u nongñiah truck u la khlad noh ha shen ha ka jingjia aksiden kaba la jia hynne ka janmiet ha surokbah National Highway 6 (NH-6), ha ka thaiñ Umling, Ri-Bhoi District, hadien ba ka truck kaba u ñiah ka la leit ban tynrah nadien jong kawei pat ka truck, kaba la pynlong ïa katei ka truck ban kylla hapdeng surok.

Katkum ka tyllong khubor, katei ka jingjia ka la jia ha ka por kumba 7 baje janmiet, ha kaba baroh ar tylli ki truck ki dei kiba kit dewbilat bad ki dang hiar sha Guwahati, Assam.

Ka truck kaba tynrah nadien ka don ïa u registration number WB 57 D 2824, katba ka truck kaba shah tynrah ka don ïa u registration number AS 01 TC 1913.

Katkum ka jingtip ba la ïoh, ka truck kaba wan nadien ka ba la niah sted da u Draibar bad haba ka la poi ha katei ka bynta jong ka surok kaba long khongwaiñ, ka la leit ban tynrah nadien jong kawei pat ka truck kaba kit dewbilat.

Na katei ka jingjia, ka truck kaba shah tynrah ka la kylla hapdeng surok, hynrei ym shym la don kiba mynsaw na katei ka truck. Katba, ka truck kaba tynrah nadien ka la julor ha ki bynta ba sha khmat, bad u nongñiah jong ka u la sahkut hapoh ka truck, ha kaba u la khlad noh ha katei hi ka jaka.

Mar ïa ïoh jingtip shaphang katei ka jingjia, ki pulit ka Nongpoh ki la poi mar-mar sha katei ka jaka ban pynlong ïa ka jingtohkit. Naka liang ki pulit Ki la pyrshang ruh ban sei ïa u nongñiah uba la sahkut hapoh ka truck bad ban weng noh ïa baroh ar tylli ki truck na katei ka bynta jong ka surokbah.

Haduh ba pynmih ïa kane ka khubor, ki pulit ryngkat bad ki briew jong ka National Highways Authority of India (NHAI) ki dang trei shitom ban tan bad weng ïa kitei ki ar tylli ki truck na katei ka jaka, ha kajuh ka por ba ki dang pyrshang ban sei ïa ka met jong u nongñiah uba la sahkut hapoh ka truck.

Haduh mynta ki pulit ka Nongpoh ki dang bteng ïaKa jingtohkit halor kane ka jingjia ban lap īaka daw jong katei ka jingjia aksiden.