Plie u Lat ia ka jingrakhe dap 100 snem ka Rilbong Sanatan Hindu Dharma Sabha

Ka Rilbong Sanatan Hindu Dharma Sabha hynne ka sngi Thohdieng ka la plie paidbah ia ka jingrakhe ba shi snem lynter ia ka jingiaid lynti ba shispah snem (centenary), kaba long ka sienjam ban sah kynmaw ha ka histori jong ka imlang sahlang. Kane ka jingrakhe ka iatyngkhuh lang ruh bad ka jingrakhe ba 100 sien jong ka Durga Puja ha Rilbong.

U Lat ka jylla, u CH Vijayashankar u la plie paidbah ia kane ka jingrakhe bad u la ai burom ia ki pateng bynriew kiba la kloi ban noh synniang bad ka jingtrei shitom ban pynwandur ia ka imlang sahlang ha kine ki shispah snem kiba la dep.

Ula pynkynmmaw ia ka histori kaba mynshuwa jong ka Sabha, u Lat u la iathuh ba 37 ngut ki nongtrei jong ka sorkar Phareng (British) la sam jaka bad ai ram shna iing ia ki ha ka snem 1925, katba ia ka puja kaba nyngkong eh la pynlong hapoh shnong ha ka iing shimet ha ka snem 1927. Ha ktei ki snem, kane ka imlang sahlang ka la seng ia ki shlem pule puthi, ki synjuk imlang sahlang bad ki riti dustur, kaba kynthup ia ka skul, ka Library bad ka sports club.

Ha kajuh ka por ula ban jur halor ka jingdonkam ban pyniasnoh ia ki samla ha ki kam jong ka imlang sahlang, khnang ba kin sngewthuh ia ka pateng tynrai bad shim ia ka jingkitkhlieh ban ialam ia ka lawei shakhmat.

Ha kane ka sngi, la pynkup burom ruh ia 25 ngut ki riew pawkhmat kiba la noh synniang ha ka imlang sahlang.

U Director General jong ka Assam Rifles, u Lieutenant General Vikash Lakhera u la ong ba ka jingsngewrit, ka jingiasuk ha ka imlang sahlang kan pynskhem ia ka jingiadei hapdeng ki briew .

Ula ong ba kum kine ki jingrakhe kan pynkhlain ia ka jingiadei hapdeng ki briew bad kyrmen ba ka jingsuk kan neh ha kylleng ka thain Lam-mihngi.

Ha kane ka sngi, la donlang u MLA ka South Shillong uba long ruh u Myntri ka tnat Lariti u Sanbor Shullai, ka DGP ka jylla ka kong Idashisha Nongrang bad u advisory body chairman, u bah DP Wahlang nalor kiwei de.