Dap 100 snem ka skul St. Mary Mazzarello ha jingshakri ban ai jingstad ia ki khynnah

Ka St. Mary Mazzarello Girls Higher Secondary School Jowai kaba la seng la sdang bad pyniaid da ki Sister Salesian naduh u snem 1926, ha ka 30 bad 31 tarik u bnai October kala pynkut noh iaka jinglehkmen dap 100 snem ka jingiaid lynti jong ka ha ka ban ai jingshakri lyngba ka jingnang jingstad hapoh Rilum Jaiñtia.

Ha ka sngi pynkut kaba la long ha ka 31 tarik, u Vincent H Pala, MP barim ka Lok Sabha uba dei ruh u President ka Catholic Association jong ka Shillong Archdiocese ula long kum u kongsan, u Father Ferdinand Dkhar, Bishop Jowai Diocese kum u symbud kongsan haka jingdonlang ka DSEO ka West Jaiñtia Hills, ka Wa-I-Sa Sumer, ki Father, ki Sister ba don ha ki kyrdan bad ki kam bapher bapher naka bynta ban shakri iaka balang bad ka imlang sahlang, ki khynnah skul barim, kiba shah khot sngewbha bad kiwei.

U Vincent H Pala haba kren u ong, “Kane ka sngi kam dei tang ka jinglehkmen iaka jingdap 100 snem ka jingiaid lynti bad shah shitom ka skul ban shakri haka pule puthi, hynrei ka 100 snem dei ruh ka jingsah kynmaw ha ki pateng bala leit bad ki ban sa wan. Ka pyrthei ka kylla hynrei ka jingiohi jngai kane ka shlem pule naka bynta ban ai jingnang jingstad iaki khynnah skul bad ban tei iaka longbriew manbriew ba bha kan nang bteng ban ai mynsiem”.

U ai jingiaroh ruh naduh ki Sister ba peit ia kane ka skul kumjuh baroh kiba don bynta ban pyniaid beit kynthup ka School Managing Committee, ki nonghikai, ki khynnah skul barim bad ba mynta halor ka jingkiew sted kane ka skul ha ki liang baroh.

U iaroh iaka bynta jingtrei shitom ki nonghikai halor kumno ban pynwandur iaka pule puthi, ka rukom im ki khynnah naduh dangrit, da kaba khmih lynti ba kin nangtrei shitom shuh shuh shakhmat ym ban pyrkhat tang naka bynta ka tulop, kumba ha ki 100 snem bala leit kane ka skul kala pynmih shibun ki riew stad riew shemphang kiba la trei haki bynta bapher bapher.

U kyntu iaki longkmie longkpa ban iatreilang ryngkat ryngkat bad ki nonghikai namar kine baroh ar ki don ka bynta ba kongsan ban kyntiew iaka pule puthi ki khun ki khynnah skul.

Na ka bynta ki khynnah pat u ong, “Ka jingwan jong phi hangne ym tang ban ioh iaka jingnang jingstad, hynrei ban tip ruh iaka tynrai, ka akor burom bad kiwei ki jait jinghikai naka bynta ka longbriew ba bha ba miat”.

Ha kaba u khmih lynti ruh ba kin poi sha ka kyrdan ka nam ba kham shalor ka jingim.

Ha kajuh ka por u iaroh iaki Missionary kiba iohi jngai halor ka jingdonkam ban pynkupbor iaki kynthei da kaba seng ia kane ka skul ba kyrpang naka bynta ki kynthei khnang ba kin ioh iaka jinghikai ba kyrpang.

Katba naka liang u Father Ferdinand Dkhar, Bishop ka Jowai Diocese haba kren u ong, ka jingpoi ki Salesian Sisters ha Jowai ha u snem 1926 kala long ka jingkyrkhu iaka Rilum Jaiñtia khamtam ha Jowai, u ong ba watla ha kaba sdang ki mad shibun ka jingeh ruh hynrei daka jingtrei shitom jong ki lah ban iohi iaka nam bad jinglong jingman kane ka skul kumba ka long mynta.

U la ai khublei ruh ia baroh ki Sister, ki Principal, ki nonghikai, ki khynnah skul barim kiba la trei shitom lang ban kyntiew iaka skul.

Shwa kane la ioh ka jingkren lyngkot halor ka jingiaid lynti ka skul na ka Sister Theresa Phawa, Principal St. Mary Mazzarello Girls Higher Secondary School Jowai nalor kiwei pat.

Ka jingpynkut iaka jinglehkmen kala long kaba phuh phieng bad shongkun bha lyngba ka jingshim bynta ki khynnah skul ha ki jait jingpynbyrngia bapher bapher naduh ka jingshad jingrwai, lehkai Karate, leh March Past bad kiwei de.