Ym lah ngeit ka Hima Nongkhlaw ban don 10 hajar ki Garo ba long shipai ia u Tirot Sing

Ka Hima Nongkhlaw ka la kubur ba ki don ki Garo kiba iarap ia u Syiem Tirot Sing Syiemlieh kum ki shipai namar ba ka Hima ka dei kaba iar shaduh Sylhet shaduh thain Garo Hills, Assam ba mynta ha kito ki snem.

Dang shen u bah Paul Lyngdoh uba dei u myntri sorkar, ula kam ba katkum ki kot kiba ula ioh na ka jingwad bniah, ki don kumba 10 hajar ngut ki Garo kiba long shipai ha u Tirot Sing ha ka por ba u ialeh thma pyrshah ia ka sorkar phareng ha u 1829 ne ka Khasi Warfare ter ter.

Ban shai halor kane, la ioh ban iakren ia u Myntri ka Hima Nongkhlaw u babu Boldness Nongum uba la batai ba katkum ka histori, ki don ki Garo kiba wan iakhun bad u Tirot Sing pyrshah ia ka sorkar phareng hynrei kam don ka jingthoh ba kin don haduh 10 hajar ngut.

U babu Boldness ula ong ba ka Hima kam don jingkhein kaba biang, hynrei ki lah ban don kumba 1 hajar eiei ki Garo kiba iarap ban long shipai ia u Syiem Tirot Sing hynrei ym haduh 10 hajar kumba la ong u bah Paul kumba u la ioh na ka jingwad bniah bad ula ong ba ka Hima kam tip ia kane namar ba kiba wad bniah kim wan sha ka Hima.

“Na ka liang jong ngi, ngim nud ban ong ba kadei 10 hajar ne shi hajar. Ki Garo ki bun hi tangba ngim pat ban ioh ia ka number jong ki namar ym don jingthoh bad la shu ia mutdur,” ong u Myntri ka hima Nongkhlaw.

U la ong ba ka Hima ka sngew burom ia ki Garo, hynrei kim don ia ka jinkhein ba tikna katno hajar katno spah watla ka sakhi ka don ki Garo kiba wan iarap ban long shipai bad lehse ka lah ban dei ka jingbakla shon ia ka kot.

Ha kajuh ka por, u babu Boldness ula ong ba ha ka Hima Nongkhlaw, kam ju thung Sordar ia ki bym dei Khasi hynrei ka ju ai jaka tang ban rep ban riang kum ki khun ki raiot.

“Kum ka dak ka jingsngewburom ia ka jingiarap ki para Garo. U Syiem u ai ka jaka ia kai tang na bynta ban shong ban rep ban riang, ym ban ai duh ia ka jaka bad ym ba kin long Sordar hynrei ki ai ia ka kyrdan Chairman,” ong u babu Boldness.