Bun tylli ki projek kam pynroi plie u Myntri Rangbah ha Chokpot

U Myntri Rangbah ka Jylla u Conrad K Sangma hynne ka sngi, ula plie ia bun tylli ki projek kam pynroi ha Chokpot, kaba kynthup ia ka Block Office kaba thymmai, Farmers Market, PRIME Hub bad Artylli ki Jingkieng bad ka pynthikna ia ki nongshong shnong ban buh shuh shuh ia ki nongai jingsumar ha ka CHC Chokpot.
Kane ka jingplie kadei shi bynta jong ki kam pynroi kaba kynthup ruh ia ka jingialang jong ka CM Connect.
U Conrad Sangma ula plie ia ka Integrated Block Office Complex jongka Chokpot Community and Rural Development (C&RD) Block, kaba la tei haka jinglut kaba kot T.2.77 Klur bad ia ka Chokpot Farmers Market, kaba la tei ha ka jinglut kaba kot T.9.26 Klur hapoh jongka Department of Agriculture and Farmers Welfare bad la pynwandur ia kane ka jingtei na ka bynta ban ai jingmyntoi ia palat 3,000 ngut ki nongrep ban die ia ki marrep ki jongki.
Nalor kane ula plie ruh ia ka Chokpot Warima PRIME Hub, kaba la tei ha ka jinglut kaba kot T.6.32 Klur hapoh jongka MeghaLAMP/IFAD project ban pyniasoh bad ki 3,570 ngut ki nongrep kiba iadei bad ki kam jong ki siej bad u kwai.
U Conrad ula plie ia ka Double-Lane RCC Bridge ha Chokpot ha ka jinglut kaba kot sa T.3.58 Klur bad kaba la pynjrong biang na ka jingkieng kaba lah dep ban don lypa. Nalor kane ula plie ia ka Gonggangre High-Level Bridge halor ka Wah Dareng haka jinglut kaba kot T.4.79 Klur da kaba pyniasoh lang ia ka jingmang tyngka jong MGNREGA bad ka Meghalaya Basin Development Authority, ha kaba T.3.79 klur kala wan na ka MGNREGA bad T.1 Klur na ka MBDA.
U Myntri Rangbah ula kular ruh ban pynbun shuh shuh ia ki nongai jingsumar ha
Chokpot Community Health Centre (CHC) na ka bynta ban lah ban pynbit pynbiang ia ka jingdonkam ki paitbah ban ioh ia ka jingsumar.
Ha ka jingialang jong ka CM Connect la ioh pdiang 99 tylli ki jingujor na ki nongshong shnong ka Chokpot bad na kine ki 99 tylli ki jingujor lah dep ban shimkhia bad pynbeit ia ki 70 tylli, katba kiba dang sah sa 29 tylli ban ioh ban pynbeit noh kiba iadei bad ka jingsngewkhia halor ka bording elektrik, ki lynti ki syngkien, umbam umdih, pule puthi, ka koit ka khiah, jingai jingiarap da ka pisa bad ka MGNREGA.
U Myntri Rangbah ula pynpaw ruh ba 92 tylli ki projek kiba kot T.941.48 Klur
Klur kidei kiba lah dep bhah ha South Garo Hills bad na kitei 18 tylli kidei kiba lah dep ban tei katba 37 tylli kidei kiba dang iaid shakhmat bad 37 tylli ki dei kiba dang pynkhreh ban ioh ban pyntrei noh.
Ha kane ka prokram la wan ban iashimbynta da u MLA ka Chokpot u Sengchim N. Sangma, u MLA ka Rongara Siju u Rakkam A. Sangma, ki MLA bad ki MDC kiba rim, ki heh ophisar ka district, ki dkhot jong ki SHG, ki samla pule bad ki paitbah ka thaiñ.