Ka Khasi Students’ Union (KSU), Mawrengkneng Circle hynne ka sngi ka la ioh bat ia saw ngut ki briew kiba dei ki nong Bangladesh, kiba la rung beain sha India bad ha jylla Meghalaya khlem ki kot ki sla kiba biang katkum ka aiñ.
Ha ka kyrwoh khubor, ka seng ka la ong ba ha ka jingtohkit, la ïoh jingtip ba kine ki briew la kit ia ki naka shnong Skhenpyrsit West Jaintia Hills District bad ki la ïoh jingïarap na ki katto katne ki briew kiba leh kum ki agent ban pynpoi ïa ki sha ki jaka ba ki thmu ban leit.
Katkum ki jingtip bad ki dur video kiba ka Seng ka la ïoh lum, la suba ba kine ki briew ki la siew haduh T.45,000 marwei na ka bynta ban pynrung ïa ki sha India lyngba ki rukom kiba beaiñ, kynthup ïa ka jingpynkhreh ïa ki kot ki sla thok kum ki Aadhaar Card.
Ka seng ka la ïoh jingtip ruh ba u nongñiah kali uba don bynta ha ka kam kit briew u la kam ba u la ïoh pdiang ïa ka phone call na uwei u briew ban bthah ïa u ban kit ïa kine ki briew, hynrei u la ong ba um tip eiei shaphang ka jinglong jong kane ka kam. Hadien kata, u la bthah ïa ki ban hiar ha Dam.
Na ka liang ka seng ka pynpaw ka jingsngewkhia jur halor kane ka jingjia, khamtam haba la mih ki jingsuba ba don ki agent kiba trei lang ban pynsuk ïa ka jingrung beaiñ sha ka ri lyngba ki kot ki sla thok.
Ha kajuh ka por, na ka liang ka KSU Mawrengkneng Circle, ka maham jur ïa kino kino ki briew ne ki kynhun kiba donkti ha ka kam pynrung beaiñ ïa ki nongwei sha ka ri, ka jingpynkhreh ïa ki kot ki sla thok bad ka jingai jingïarap ban leh ïa ki kam kiba long pyrshah ïa ka aiñ, ba kin sangeh noh mardor ïa kine ki kam.
Hadien kane, na ka liang ka Seng ka la aiti noh ïa kine saw ngut ki briew sha ka Diengpasoh Police Station na ka bynta ban leh ïa kaba donkam katkum ka aiñ bad ban pynlong ïa ka jingtohkit kaba bniah.
Ka Seng ka kyntu ïa ki bor pulit ba kin pynlong ïa ka jingtohkit kaba bniah, ban lap ïa ki agent kiba la suba donkti bad ïa baroh kiba donkti ha kane ka kynhun treikam, bad ban shim ïa ki sienjam kiba dei katkum ka aiñ.
You may also like
-
Kynduh ki nongialam KSU ia ki nonghikai KJDSTA ban ai jingkyrshan ia ki jingiakhih
-
Ka jingkren jong nga ka dei tang ia ki nongialam ym ia baroh ki nonghikai: Prestone
-
Ki ‘Sohpyut bad kruin’ ki don ha Secretariat ym ki Nonghikai:HYC
-
Ïashim bynta u Lat ha ka Jubili Ksiar ka Wangala Festival
-
Hiar arsut ka ïoh ka kot ba shim ram ki briew ba don ha ka bor
