Noh syniang ka HNYF da ki jain syaid ia ki longiing baduk kum shibynta ban rakhe Khristmas

Ki nongialam ka HNYF, Women Wing, Sengkmie ha ka jingiatreilang bad ka Women’s Wing ka 20 Mer Circle, mynta ka sngi ki la pynlong da ka programme ban sam ia ki Jain syaid sha ki longiing baduk kum ka dak ban ia lehkmen lang ha ka jingpdiang ia ka jingwan long briew u Trai Jisu Khrist lane ka aiom lehkmen Christmas bad ia u snem thymmai. Ia kine ki jain syaid ba la sam sha ki longiing kiba la jied na kylleng ki shnong ka thaiñ 20 Mer, la sam ha ka programme lehkmen ba la pynlong ha ka shnong Pahammawlein, Ri Bhoi District.

La wan ban ia donlang ha kane ka prokram daka General Secretary ka HNYF Women’s Wing, ka Kong Phrinsibon Kharmuti, u President ka HNYF Northern Region, u Bah Hesting Lyngdoh, u Vice president ka HNYF sengkmie u Bah Barnabas Manih, ka President ka HNYF Women’s Wing 20mer Circle, ka Kong Doramon Syngkli, u Rangbah Shnong ka Pahammawlein, u Bah K. Syngkli lem bad kiwei kiwei ki riew rangbah. Na ka liang ki nongialam ka HNYF, Women’s Wing lem bad ka Northern Region, ki la pynpaw ia ka jingkmen ba kum ka seng ka la ioh ban bteng ia ki kam lehkmen ban pdiang ia ka jingwan longbriew u Trai Jisu Khrist lyngba ka jingai bynta lem da ki jain kup ba syaid sha ki 25 tylli ki longiing ka thaiñ 20 Mer.

Kum ki nongialam, ki la ai ruh ia ki kyntien ai mynsiem bad ka khubor Christmas ban wanrah ia ka jingieid jingiatylli, ban kyrshan lang i wei ia iwei pat bad ban lehkmen lem da ka jingsngewrit, ha kaba ki la ai ruh ia ka jingkitbok kitrwiang na bynta ka aiom Christmas bad ban pdiang ruh ia u snem thymmai 2025 u ba dap da ka jingkmen bad ban pahuh pahai.