Ïoh mynsiem ka NPP ha Jirang ba wan pynïasoh ki nongïalam Congress, TMC

Katba ka ileksion MDC ka la nang jam kham shajan, ka jingpynkhreh ki political party hapoh ka jylla ban pynrhem ia la ki shlem ka la nang khluit ha kaba la sakhi ruh, ba ka party National People’s Party (NPP) ha Jirang Block ka la nang ioh mynsiem hadien ka jingwan pyniasoh da ki nongialam ka party Congress, TMC na Jirang Block.Napdeng ki nongialam ka Congress kiba la pyniasoh sha ka NPP ki kynthup ia u Abraham Sangma, Adviser ka Jirang Block Congress Committee, (JBCC), Markus Sangma, Vice-President ka JBCC, Bijoy Ronghang, Joint Secretary lem bad kiwei, ha kaba la pdiang sngewbha ia ki ha shnong Nongthymmai, Byrnihat. Ha ka jingialang pdiang burom sa ia ki nongialam ka party TMC kaba la long ha 13 Mer Tamulkuchi,

 Jamilson Sangma President ka TMC, Jirang Block, Rickstar Sangma bad kiwei kiwei nalor ki nongialam ka party Congress. Haba kren ban pdiang burom ia ki nongialam ka party Congress, TMC u Bah Sosthenes Sohtun, kum u MLA ka party NPP bad kum u kyrtong ha kane ka ileksion ban wan, u la pynpaw ia ka jingkmen kaba khraw ban sakhi ia ka jinglong kaba kloi bad ka jingiohi jngai jong ki nongialam ka party Congress bad kiwei kiwei kiba la shaniah ha ka party NPP ban ai ka jingiatreilang ha kane ka ileksion MDC kaban sa wan.

U la pynpaw ruh, ba na ka liang ka party kan nang treishitom ha ryngkat ka jingiadonlang jong ki nongkitkam bad ki nongkyrshan kumno ban pynkhlaiñ ia ka party na bynta ka bit ka biang bad ka roi ka par jong ka Jirang Konstituensi hi baroh kawei, khamtam kan long ruh kum ka jingiatreilang na bynta ka jingpynkhreh ruh ia ka ileksion MDC kaban sa wan na bynta ka jingjop jong ka party NPP.