Kular ka BJP ban ai tulop ia ki Khlieh Nongsynshar, Sordar bad Rangbah Shnong

Ka Bharatiya Janata Party (BJP) Meghalaya hynne ka sngi ka la pyllait paidbah ia ka Manifesto lane ka jingkular jong ka ilekshon sha ki 2 tylli ki Autonomous District Council (ADC) kata ka KHADC bad JHADC. Ïa kane la Manifesto la pyllait paidbah da u President ka Meghalaya BJP u Rikman G Momin ha ka jingdonlang ki kyrtong ki ban iakhun ha ka ilekshon MDC na KHADC bad JHADC. Ha ka jingkular ka Meghalaya BJP ka kular ba lada ka wan ha ka bor ha ki 2 tylli ki District Council, kan pynioh noh da ka tulop ia ki Khlieh Nongsynshar kynthup ki Sordar bad ki Rangbah Shnong. Ka BJP ka kular ruh ban sam jingiarap pisa kaba T.2000 shi bnai ia kiba bylla sngi kum ki lane ki Nongtrei kynta, ki nongniah taxi, kiba khlad lok, ki longkmie ba kyrshan dalade, ka kan pyntreikam daki Dorbar Shnong.

Haba iadei bad ka jinghiar palat ka khajna namar ka jingkhang tih dewiong, ka Meghalaya BJP ka kular ba kan sdang noh ia ka kam tih dewiong kat kum ka jingbthah jong ka Iingkashari ba khlieh duh ka Ri India kata ka Supreme Court ban pynkiew ia ka jingiohnong jong baroh 2 tylli ki District Council. Sarong ia la ka jong kan long kawei na ki lad ban kyntiew ia ka kam ingoh kai bad ban kyntiew ia ka kolshor jong ka jylla” ka dei kawei na ki mat ilekshon jong ka BJP nalor ka jingpynkhlain ia ka jingai jingsumar dawai kynbat ha ryngkat ka jingiatreilang bad ka AYUSH Ministry. Haba kular ban thung ia ka Committee ka ban khmih bniah ia ka jingpyntreikam ia ki skhim paidbah hapoh ki District Council, ka BJP kala kular “ka District Council kan pynmih ia ka Tnad ka ban khmih bniah halor ka jingbei tyngka na ka bynta ban sengkam ki samla trai ri bala nang la stad ha ryngkat ka jingiatreilang bad ki Syiem, ki Dalloi bad ki Dorbar Shnong.

Halor ka jingpynkylla ia ka Sixth Schedule, ka BJP kala pynpaw ba kan buddien ia ka jingpynkylla khnang ban pynkiew ia ki MDC ba shu thung hapoh 6 bnai bad ka Party ka dawa ba uwei u MDC ba shu thung u dei ban dei uwei u Syiem ha KHADC bad uwei u Dallloi ha JHADC. Ka BJP kala kular ruh ba kan wanrah da ki buit thymmai ban pynseisoh ia ki jaboh jabain kiba mih na man ki Hima bad Elaka bad ban ai jingiarap beit beit n aka Council ban thied ia ki kor ki bor ban pynsaphret ia ki niut. Ka BJP kala kular ruh ba kan wanrah ia ka rukom thungkam kaba khuid hapoh ki District Council.