Kad wak ka VPP ha Nongstoiñ, yn iakhun u Micheal Thongni kum u kyrtong shimet ba pynduh tiket ka VPP

Ka Party Voice of the People Party (VPP) Nongstoiñ ka la nangstait bad ring sdot namar ka jingmih ba khlem sangeh jong ki nongialam namar ka jingbym sngew tynnad shuh ia ka rukom treikam jong ka Party khamtam ia u President rangbah uba dei u nongialam. Kane ka paw na ka jingiai bteng ban iehnoh kam jong ki dkhot bad ki nongialam jong katei ka party bad mynta sa uwei pat u nongkyrshan ba radbah jong ka VPP uba dei ruh uwei na pdeng ki san ngut kiba la applai tiket na ka Party na Nongstoin u la rai ban mih noh na ka party. Utei u samla u dei u Bah Micheal Thongni uba la shim syndon ia ka rai ban ieng iakhun kum u kyrtong shimet. U Bah Micheal u dei uba ia applai tiket ryngkat bad u Bah Marbiang Nongsiej, Bah Will Sohshang, kong A.Kharsyntiew bad kong Ibiris L.Nonglait.

La sngewthuh ba ka jingmih madan kaba kyndit jong u samla Michael Thongni ban ïakhun election MDC  kan pynklumar jingmut ïa  kiwei pat ki seng saiñpyrthei ha Nongstoiñ khamtam eh ïa ka VPP. Na ka jingmih jong u Bah Micheal Thongni, ka seng VPP ha Nongstoiñ kan mad ia ka jingeh namar kan duh noh ia shibun ki nongialam bad nongkyrshan jong ka party namar utei u samla u dei uba la synñiang shibun ïa ki samla kyrduh kam jong ka thaiñ khamtam eh ïa ki briew kiba duna dkhot met, ki longïing riew kynthei bad u duk u suk.

La ioh jingtip ba ka jingshim rai jong u Bah Micheal Thongni ban ïakhun ia kane ka election, ka dei hadien hynñiew sien kynthih ba ki samla bad ki riew rangbah jong ka thaiñ kynthup ia ki longkmie ki la pynpaw ba ki thrang ia u ba un mih madan ha kane ka kynti bad dei ha ka jingialang kaba la pynlong ha ka 1 tarik u Rymphang 2025 ba u la pynkohnguh ialade bad shim syndon ia ka rai ban ïakhun kum u kyrtong shimet na Nongstoiñ.