Khang ka MSPCB 6 tylli ki karkhana ha Byrnihat, mar T.6 lak shah dain kuna 2 tylli ki karkhana

Hadien ka jingmih ki jingujor na kiba bun ki liang ha kaba ia dei bad ka jingjaboh kaba la palat liam jong ka lyer ring mynsiem ha ka thaiñ Byrnihat tang namar ka jingdon jong ki karkhana kiba pynmih beaiñ ia ka tdem puipui khamtam ha ka por mynmiet hynnin ka miet, ki ophisar na ka tnad Meghalaya State Pollution Control Board (MSPCB), ka la leit ban khang syndon haduh 6 tylli ki karkhana kiba la iaid lait ia ki kyndon ain ban pynmih ia ka tdem puipui. Ia kitei ki karkhana kiba la shah khang ki dei kiba don hapoh ka Export Promotion Industrial Park (EPIC) Byrnihat, halor ka nongrim ba kim shem la bud satia ia ki kyndon ain pynmih tdem jaboh kaba la ktah shikatdei ia ka koit ka Khiah ki paidbah bad ruh ia ki jingthung jingtep bad ka thaiñ Byrnihat ka la ioh ia ka nam kum ka thain kaba jaboh tam ha ka ri India la ar sien kynthih. Kine ki karkhana kiba la shah khang ha ki bor ka MSPCB ki kynthup ia ka Shyam Century Ferro Alloys Pvt Ltd, ka Khasi Alloys Ltd, ka Nalari Ferro Alloys Pvt` Ltd, ka Pawan Casting Pvt Ltd, FW Ferro Tech Pvt Ltd bad ka SR Bio-Product Pvt Ltd ha kaba la daiñ kuna ruh kumba 6 lak tyngka ia ar tylli ki karkhana.

Na ka liang ki bor ka MSPCB, ha ka janmiet jong ka 4 tarik ki la hiar biang sha ka thain 13 Mer, ban jurip ia ki karkhana kiba la suba pynmih tdem jaboh khamtam ha ki por mynmiet, hynrei ym shem la ioh bat satia ia kita ki karkhana kiba iaid pyrshah namar don kiba la ai daw ba ki la khang bad don pat kiba la aidaw ba ki thut ki tiar ki tar. U Bah YF Laloo, Environmental Engineer ka tnad MSPCB, haba kren bad ki Nongthoh Khubor u la iathuh, ba ka tnad hadien ba la ioh ia ki jingujor kiba bun halor ka jingjakhlia ka lyer jaboh ba mih na ki karkhana, ka la pynlong ia ki jingjurip ban khmieh bniah ia ka jingpynkhein ia ki kyndon ain halor ka jingpynmih ia ka tdem puipui kaba jakhlia da ki karkhana kiba don ha ka thaiñ Byrnihat. La iathuh ruh, ba naduh ka 24 tarik Kyllalyngkot mynta u snem ka tnad MSPCB ka la jurip naphang ia ki karkhana bapher bapher kiba don ha ka thaiñ Byrnihat bad West Khasi Hills District bad khlem da shongthait la miet ne sngi, ka jingjurip ka iaid shakhmat watla kum ka tnad ka don jingeh namar ka jingdon tang kawei ka ophis treikam kaba ha nongbah Shillong.

Shuh shuh ruh, la iathuh ba na ka liang ka tnad hi ka la khang khyrdep ia ki 6 tylli ki karkhana ha kaba la daiñ kuna ruh ban siew ia ka Environment Compensation halor ka jingpynmih ia ka tdem jaboh palat ia kaba la buh da ka kyndon ain, la daiñ kuna 4 lak tyngka ia ka Shyam Century Ferro Alloys Private limited bad 2 lak tyngka ia ka Khasi Alloys Private limited. U Bah Laloo, u la pyntikna ruh ba ka tnad MSPCB kan nang iai bteng ban jurip ban buddien na ka por sha ka por ia kiwei kiwei ki karkhana ha ka jylla kiba iaid lait ia ki kyndon ain ban pynmih tdem puipui bad lada lap kin shah pyngngat katkum ki kyndon ain.