Pyrshah ka UDP ia ka UCC, dawa pynkylla ia ka Para 12 (A) ban pynkhlain ia ki District Council

Ka United Democratic Party (UDP) hynne ka sngi ka la pyllait ia ki Arphew tylli ki mat treikam na bynta ka ilekshon MDC,2025. Ha kane ka sngi ba pyllait ia ki mat treikam, la donlang u General Secretay ka party u Dr. Jemino Mawthoh, u bah Paul Lyngdoh u MLA uba dei ruh u Myntri sorkar jylla, u bah Titossstar Chyne, ki kyrtong ban aireng sha MDC ilekshon nalor kiwei de ki nongialam. Ki Arphew tylli ki mat treikam ka UDP ki kynthup u Pud u sam ka jylla, ban pynkupbor ia ki District Council bad ka party kan dawa na ka sorkar ban pynkylla ia ka Para 12 (A) ka ban kdew shai ia ki ain ka sorkar pdeng bad ka sorkar jylla, ka jingkyntiew ia ki riewlum trai ri da kaba pynbeit thymmai noh ia ka thup jong ki Scheduled Tribe ha ka jylla, ban pyrshah ia ka Uniform Civil Code, ban wanrah ia ka synshar khaddar kaba khuid ban tehlakam ia ki khyrdop khrong khajana beain ha ki surok kiba hap ha u pud u sam ka KHADC bad JHADC, ban pynneh pynsah ia ka jingsumar trai ri, ban dawa ban pynrung ia ka ktien khasi bad Garo ha ka khyrnit ba phra jong ka riti synshar ka ri, ka hok halor ka khyndew ka syiap bad ki mar poh khyndew, ka jingiada mariang bad ka khuid ka suba, ka jingpylong ain ia baroh ki riti dustur jong ki Hima, Elaka, ka jingtehlakam ia ka jingrung khyrthlep ki poiwir bar jylla, ka khaii pateng bad ki iew ki hat, ka jingpynkhlain ia ki iing kashari, ka jingpykhlain ia ka pla tyngka jong ki Council, ka jingpyntreikam ia ka ain shna iing bad ban pynneh pynsah ban kyntiew ia ka riti dustur.

U Nongialam ka UDP u bah Titosstar haba kren ha kane ka sngi, ula ong ba don kiwei ki party ha ki mat treikam jong ki, ki dang mutdur bad ki dang kren ban pynlong ain ia ka rukom ai jingsumar trai ri ka Traditional Medicine Commission, ka Solid Waste Management Act bad kiwei de, hynrei ka UDP ka la dep ia ka kam bad kaba sah mynta ka long tang ba kin pynkhlain shuh shuh ia kine ki ain. “Kiwei ki dang mutdur ban pynlong ain hynrei ngi ladep pynlong ain ia kaei kaba ki thmu. Ka kamram jong ngi mynta ka long ba lada ngi leit sha u paidbah bad lada u paidbah u dang jied biang ia ka party, ngin leit sha Council ngin nang pynbha shuh shuh ia ki ain,” ula ong.

Haba iadei bad u pud u sam, u bah Titosstar Chyne ula ong ba ka party ka ieng beit halor ka nongrim ba u pud u sam ka Hima udei u pud u sam ka jylla bad ha ka por ka EC jong ka UDP ka ladep thaw ia Boundary Committee bad ki la ai ia ka kaiphod ba pura sha ka sorkar jylla haba iadei bad ki kot ki sla jong ki jaka khappud. Ula ong haba iadei bad ka jingpykylla ia ka Sixth Scheduled, ka party ka la leit shaduh sha Delhi ban buddien bad pyrshah ia ka jingpynrung ia ka Unrepresented Tribe.