“Ka jingpynkynriah ïa kiba na Them Ïew Mawlong kan kham shim por”

U Symbud Myntri Rangbah ka jylla u bah Sniawbhalang Dhar ula ong ba ka jingpynkynriah ia ki Khar Harijan na Them Iew Mawlong kan kham shim por khyndiat namar ba sorkar ha shwa ba kan pynkynriah ka kwah ban la leh sani bha bad bishar bniah bha bin-ba pin khnang ban skhem baroh shirta. Haba kren sha ki lad pathai khubor, u Symbud Myntri Rangbah ula ong ba ka ishu Harijan kadei kaba la sah da ki phew tylli ki snem bad shwa ban pynkynriah ka sorkar ka dang bishar bad peit bha khnang ban lah ban weng lut shi sien weng ia baroh ki jingeh bad ban lait na ka jingshah tuklar ha ka Kashari.

“Watla ka jingpynkynriah kan kham shim por hyndiat, hynrei shisien ba kan biang kan biang baroh shirta, kane kadei ka jingkwah ka sorkar. Namar ia u briew ym lah ban bret kumba bret ia u maw u ksew, namar kane ka la pyrskhat sani bha,” ula ong. U Symbud Myntri Rangbah ula ong ba ka sorkar ka tip ia ka jingangnud ki paidbah bad ka sorkar ka ialeh ban pynbeit noh kloi ia kane ka ishu.

Halor ka jingpynbeit khappud, u Symbud Myntri Rangbah ula ong ba ka kam ka la iaid shaid shaid ha kaba ka Regional Committee ki la pynkhreh ia ki jingdonkam bad hadien kane kin sa wanrah sha ka sorkar ban leh ia kaba donkam. “Ka sorkar ka khlem shim sting ia ka ishu pynbeit pud u sam bad haduh mynta ka dang iai buddien ha kaba ka kam. Ki Regional Committee ki la pynkhreh shaid shaid ia ki jingdonkam bad ynda ladep,  yn sa rah sha ka sorkar khnang ban leh ia kaba donkam,” ong u bah Sniawbhalang.