Ha Raj Bhavan ioh jinghikai ki briew ba duna dkhot met halor ki skhim sorkar

Ha ka sienjam ban kyntiew ia ka bha ka miat bad ka jingkynthup ia baroh ki briew kiba don jingduna ha ki dkhot met, ka Composite Regional Centre for Skill Development, Rehabilitation & Empowerment of Persons with Disabilities (CRCSRE- Shillong) ha ka jingiatreilang bad ka Ophis Commissioner for Persons with Disabilities, Tnad Social Welfare, Sorkar Meghalaya ka la pynlong ia ka “Prokram ai jinghikai halor ki skhim jong ka sorkar bad ki sienjam na ka bynta ki briew kiba don jing duna ha ki dkhot met (Divyangjan)” mynta ka sngi ka 26 tarik Rymphang ha Durbar Hall, Raj Bhavan, Shillong Meghalaya. Kane ka prokram ka la wanrah lang ia ki tnad sorkar ba kongsan, ki NGO da ka jing thmu ban ai jinghikai bad ai jingtip shaphang ki skhim bapher bapher bad ki jingshakri ba don na ka bynta jong ki ha kylleng ka jylla Meghalaya. Ia kane ka prokram la pyniaid da u Chandrashekhar H. Vijayashankar, Lat ka jylla Meghalaya lem bad u Pravin Bakshi, Commissioner & Secretary sha ka sorkarMeghalaya, Dr. Ram ShakalSahani, Director, CRCSRE- Shillong.

La saindur ia ka prokram ban pynbeitia ki jing duna ha ka jingioh jingtip bad pynkup bor ia ki briew kiba don jing duna ha ki dkhot met da kaba pynthikna ba ki tip ia ki sienjam jong ka sorkar ba la saindur ban pynbiang ia ki jingdonkam jong ki. Ki tnad sorkar bapher bapher, ba kynthup ia ka tnad  Social Welfare, tnad ka koit ka khiah, tnad Livelihood, tnad pule puthi, tnad Employment and Labor, ki don ka bynta kaba kongsan ha kane ka sienjam. Lyngba ki jingpynshai bad ki bynta ba ai jingtip, ka CRCSRE- Shillong ka la ban jur ia ki skhim bapher bapher jong ki, ki jingai jingshakri bad ki polisi ba la thmu kyrpang ban kyntiew ia ka jingim jong ki briew kiba don jing duna ha ki dkhot met ha ka jylla. Ka prokram ka la sakhiia ka jingiashim bynta shitrhem jong ki ophisarsorkar na ki tnad bapher bapher bad 169 ngut ki nongiashim bynta. Ki jingialang iamir jingmut ki la plie lad ia ki ban buh jingkylli bad pynshai ia ki jingartatien, ka la plie ka rynsan na ka bynta ki jingiakren.

Ki nongiashim bynta ki la ioh jinghikai shaphang ka rukom pyndonkam ia ki application na ka bynta ki skhim bapher bapher bad mano ba lah ban ioh bynta ha ki prokram bapher bapher. Kane ka prokram ai jinghikai kadei tang ka jingsdang jong ka jingkut jingmut ban kyntiew ia ka jingim jong ki briew kiba don jing duna ha ki dkhot met ha jylla Meghalaya. Lyngba ka jingbtengia ki sienjam ai jinghikai, ka CRCSRE- Shillong bad ka tnad social welfare ka la khreh ban wanrah ia ka imlang sahlang ba ioh bynta lang baroh ha kaba man u briew, khlem da peit ia ka jinglah kot bor, ki ioh ka lad ban kiew shaphrang.