Mynjur ka Sorkar ia ka Meghalaya Urban Parking Policy

Ka kynhun Myntri Sorkar hynne ka sngi ka la mynjur ia ka Meghalaya Urban Parking Policy 2025. Ka Meghalaya Urban Parking Policy 2025 kadei kum shibynta jong ka Plan ban ithuh ia ki katto katne ki jaka Sor kum ki jaka pynieng kali. Haba pyntip ïa kane u Myntri Rangbah ka Jylla u Conrad K Sangma ula ong, ba ka Meghalaya Urban Parking Policy 2025 ka dei shibynta jong ka Mobility Plan na ka bynta ka Nongbah Shillong 2024 hynrei ïa kane ka Polisi mynta la pyniair sha baroh ki jaka Sor jong ka Jylla.

U Conrad u la ong ba ka Meghalaya Urban Parking Policy 2025 kan dei ban pynbeit ia ki jaka pynieng kali ha surok bad ïa kane ka Policy yn iatreilang bad ka tnat Pulit, ka tnat Pynroi Sor, ki Dorbar Shnong, ki komiti pynroi ban ithuh, ha kino ki bynta jong ki surok, long ban pynieng kali bad ha kino ki bynta ym long ban pynieng kali.“Hadien bala ithuh iaki jaka ban pynieng kali, ki ba pyntreikam ïa kane ka Policy kin shim bai pynieng kali bad kin khmih bniah haba iadei bad rukom pynieng kali khnang ban pynthikna ba kan nym don ka jingpynieng kulmar iaki kali kaba lah ban wanrah ka jingkhap niah ki surok” la ong u Conrad.

U Conrad u la ong “Lyngba ka Meghalaya Urban Parking Policy ka Sorkar ka kloi ban iarap pisa iaki Dorbar Shnong ne ki komiti pynroi kiba don ka jaka ban pynkylla jaka ïeng kali ba tei ki jingdonkam ban khmih iaka rukom pynieng kali”.