Ha ka jingialang kur pynkup burom ka kur Shylla ia ki samla pule

Ka Dorbar Kur Shylla ba long ha ka sngi saitjain 1 tarik Lber, 2025 ha Mawkynrew da ki spah ngut ki parakur parajait na kylleng ka Ri Khasi Jaintia ki la ia poi ban shim bynta ha ka Dorbar bah ba shisien shisnem. U kongsan ha kane ka Dorbar Bah u dei u Bah Wailadmiki Shylla, MLA Jowai ha kaba ia donlang ki kynrem lyndan kynthup ia u Bah R L Kharpran, Bah Rapionglang Blah, Bah Raphael Warjri bad Bah Hos Kharmuti, ki dkhot rangbahkur na ka Synjuk Ki Rangbah Kur Ka Bri U Hynñiewtrep. Ia ka jingialang la pyniaid da u Bah Pyrkhat Shylla, Khlieh Rangbah jong ka Sein Kur Shylla bad kiba la kren ki kynthup ruh ia u Saiñpyniar ka Seiñ Kur Shylla uba la ai ka kaiphot bad byllai ki jingtip shaphang ka Kur Shylla bad kiwei ki kur ba dang ia dei thana kynthup ia ki San Syngkhong, ki ba dei na ka kur Pde, Pariat, Blah, Sung, Thangkhiew, Syih, Dong, Yndoh Subi ne Lyngdoh Subi, Khapiah, Iadai, Rabon, Sajem, Ngatam, Tangliang, Chen, Thubru, Suliang, Suna, Langi, Joh, Ladia, Doom, Lamar bad kiwei kiwei kiba ym pat thikna ia ka jingiadei thana kur.

Ha ka jingkren u kongsan, Bah Wailadmiki Shylla u la ong ka long ka ba donkam ban pynneh pynsah ia ka Seiñ Kur da kaba pyrto ia ki rangbahkur Shylla kiba la synñiang ha ka imlang sahlang. U kongsan u maham ruh ba manla ki rangbah ki don ka jingkitkhlieh ha ban ri burom ia la ka long rynñieng kum ki rangbah da ka ba kdew ba ka shim por ban tei pynskhem ia ka nam ka burom bad tang shikhyllip mat ka lah ban jah burom lada bakla ha kano kano ka bynta. Kum shibynta ban pynshlur bad ai mynsiem ia ki samla bad rangbah jong ka kur la ai khusnam sha ki samla ki ba la jop ha ki kyrdan jingpule bapher bapher bad uwei na kiba khraw nam ban ioh khusnam dei u Dr Jacob Shylla uba la jop ia ka kyrdan Ph D ha ka English, uba la ai ka jingkren ba kynsai haduh katta katta na ka bynta ban tei ia ka imlang sahlang. Kiwei kiwei ba la ai jingkren ka long u Bah R L Kharpran, Khlieh Rangbah ka Synjuk Ki Rangbahkur ka Bri U Hynñiewtrep, u Bah Pyrkhat Shylla, Khlieh Rangbah ka Seiñ Kur Shylla bad la ioh ka jingkren khublei pynwai da I Kong Joplin Shylla.

Ha kane ka dorbar bah la jied ruh ia ki Nongkitkam thymmai ba kynthup ia u Bah Pyrkhat Shylla ba la neh kum u Khlieh Rangbah, u Bah Almeki Shylla kum u Saiñpyniar Lumlang, Bah Joshlin Shylla u Batsaipan, ki nongkynpham kynthup ia u Bah Kyrmen Shylla, Wailadmiki Shylla, Kong Santa Maria Shylla, Bah Wilford Shylla bad kiwei ki dkhot nongkitkam ka Seiñ Kur Shylla, Seng Kmie. La pynskhem ia ki nongkitkam thymmai da u Bah Rapiong Lang Blah bad la pynphuh pynphieng ruh ia ka Dorbar Kur da ki jingrwai jingshad na ki samla na ki shnat kylleng ka Ri Khasi Jaintia.