Lait thaw ka ophis ICAR na ka jingpluh, ba klang ka ding ha ka khlaw ba marjan

Ka jingthang khlaw khlemakor da ki riew shim kabu la kynnoh ba ka la bteng biang ha ka thaiñ Ri Bhoi District hajan ka ophis jong ka Indian Council of Agricultural Research (ICAR), ha Umiam kaba la pynher mynsiem ia baroh ki ophisar bad nongtrei hadien ba ka ding kaba la klang ka la pur sted shaduh u pud jong katei ka ophis.

Kumba la sakhi, kane ka jingjia klang kynsan ka ding ka la jia ha ki por 2 shiteng eiei mynta ka nohphai sngi, ha kaba ka ding ka la klang ha ka khlaw kaba marjan bad ka ICAR hadien ba ki pliah ding kiba la her na kawei pat ka khlaw kaba la thang dusmon da ki riew shimkabu ka la pynher mynsiem ia ki nongtrei jong katei ka ophis tad haduh ba ki la hap ban mih ban leit pynlip ia ka ding kaba la sdang pur shajan ka ophis. Kumba la iathuh da katto katne ki nongtrei ka ICAR, la ong, ba watla kim tip satia ia ka daw tynrai ba kane ka khlaw kaba don marjan bad ka ophis ICAR ka la kem ding bad sdang ban pur sha ki ophis hynrei la suba jur ba lah ban don ki briew kiba la thang dusmon bad leh khlemakor tad haduh ba ka don ka jingkem ding kaba shyrkhei namar ka jingjur jong ka lyer.

Ki la iathuh ruh, ba donbok pat ba ha katei ka jingjia kam shem la don kano kano ka jingjia kaba sngewsih ne ka jingkem ding sha ki ophis hynrei ki la pynpaw ia ka jingsngewkhia kaba jur halor ka jingdon jong ki briew kiba leh dusmon da kaba thang ia ki khlaw khamtam ha kum kane ka por tyrkhong.