Ha “Ka Mynried” la kynthup 11 tylli ki jaka pule ha East Jaintia

Ka “Soft Skills and Wellbeing Winter Camps” hapoh “ka Mynried” ba la kyrshan da ka bor synshar District jong ka East Jaiñtia Hills lyngba ka District Mineral Foundation, ki la kynthup ïa ki 11 tylli ki jaka pule ha ba 1,826 ngut ki samla ki lah ioh ia ka jinghikai haduh kine ki sngi.
Ia ki jingsam sertiphiket la pynlong ha ka sngi ba ar ba la dep, ha Iongkaluh na ka bynta 247 ngut ki khynnah skul jong ka St. Peter Secondary School bad ha Byndihati na ka bynta 126 ngut ki khynnah pule jong ka Sacred Heart Secondary School, bad 315 khynnah pule jong ka Byndihati Secondary School.
Ka kong Santa Mary Shylla ka MLA ka Sutnga-Saipung Konstitwensi ka la long kum ka Kongsan ha ka jingialang kaba long ha iingskul Sacred Heart Secondary School, Byndihati.
La pynlong ia kane ka jingialang da ka jingthmu ban tehlakam ia ki jingdih buaid hapdeng ki samla shynrang bad kynthei, ïa ki camp la shna khnang ban pynïasoh ïa ki samla ha ki kam ban pyntbit ialade bad ban khien kor ialade ruh.
La ai kyrteng “ia ka Mynried” kaba mut ha ka ktien Pnar sha “na ka bynta ka lashai ba kham bha”, kane ka Winter Camp ki la ai ruh ia ka lad ia ki samla pule ban pyni ia ki sap ki phong jong ki, ban pynskhem ia ka jingsngewrit bad ban iarap ia ki nongiashim bynta ban ithuh bad rakhe ia ki jinglong jong ki shimet bad ki nongiashim bynta ki lah bamsmai ruh ban ialeh pyrshah ia ki jingdih pynbuaid.
Ka kong Santa Mary Shylla, ka la ong, “ki winter camp ki la wanrah ïa ka jingmyntoi ha ka District namar ba ki samla pule ki la ïoh ïa ka jait jinghikai kaba lah ban kyntiew ïa ka jingim jong ki. Nga kyrpad ïa iwei pa iwei i samla pule ba kin shim ïa kane kum ka bynta ban long ki briew kiba kham bha.”
Kum ban shu pynkynmaw, kane ka bynta ka kyrshan ia ka jingthmu jong ka jylla ban ialeh pyrshah ia u droks, ka Drug Reduction Elimination & Action Mission (DREAM).
U Shivansh Awasthi, Deputy Commissioner ka East Jaintia Hills ula ong, “Nalor ka jingai jinghikai ha ki kam bapher bapher, kawei ka mat ba kongsan jong kane ka prokram kadei ban ithuh ia ki sap ki phong kaba ki khynnah ki don.”