Ngam pdiang ka jingsospon, khot iakren markhmat, lada bakla nga kloi ban panmab: Adelbert

U MLA ka North Shillong Constituency u Bah Adelbert Nongrum hynne ka sngi ula ong, ba um pdiang ia ka jingsospon ka seng Voice of People Party (VPP) namar ka jingshah sospon 3 snem ka long kumba beh seng hynrei ula pynpaw ba u kwah ban don ka jingiakren sngewthuh jingmut lada u bakla u kloi ban pan map. “Ngam hun ne pdiang lada phim khot ia ngi markhmat, ka sospon ne weng dkhot shipor ka shong ha phi, hynrei lada phi shah ia nga, ngan kyrpad ba phin pyrkhat biang da kumwei ia kane ka jingsospon. Khot ia ngi ngin iakren haba shit haba shai bad kum ki rangbah bad ngin iakren lang bad lada ka dei ba nga bakla ngan pan map, ngan dem ngan nguh ia kita ki briew ba kwah ia kata. Hynrei lada phi bakla ma phi kam pher, ngan shu ong ngin ia map noh bad ngin ia klet noh” la ong u Bah Adelberth haba kren bad ki nongthoh khubor ba ka VPP ka dei ban khot ia kren lang ia ki 5 ngut ki nongialam kiba la shah suspon dang shen.

 U Bah Adelbert Nongrum ula ong ba hashwa ka elekshon MDC ula dep ban kyrpad ia u President ka VPP u bah Ardent Miller Basaiawmoit ban khot iakren ban pynbeit ia ki jingbym iaid beit hapoh ka seng hynrei u President ula ong ba ym don por namar ka jingbun kam elekshon bad ka jingpynbna ka seng ban pynbeit ia ka kam ka jongu ynda la dep ka elekshon MDC kadei namar ba ki tieng ioh ka ktah ia ka seng VPP ha ka elekshon, hynrei kila dep pat ban rai lypa ban weng noh bad ki sa shu pynbna mar ia dep ka elekshon. Ula pynshai ba ym shim la mih na ka seng bad u khlem leh kaei kaei kaba kin pynbud nam ia ka seng bad ym pyrshah ia ka seng hynrei kaei kaba u pyrshah kadei tang ia ka rukom pyniaid ia ka seng, namar kila iaid lait ia ki kyndon jongka seng hynrei kan shong pat ha ki paidbah ba kin bishar ia kane. Hynrei haba kila wit ia u kila dei ban pynmih syndon na ka seng hynrei kila shu weng shipor ia u kum u dkhot ka seng.

“Ki lah ai ia ka Show Cause da ka jingthoh bad nga ruh nga lah ai da ka jingthoh, hynrei kumno ki hun kein haba nga lah donbynta lang ban pynlong doh pynlong snam ia ka seng VPP. Kane ka jingsuspon ka jongki 3 snem ka thew kumba ki lah beh ia nga” ong u Bah Adelberth.  U Bah Adelberth ula ong “Watla ka party kumba ka long ka paw kumba kala beh ia nga hynrei lada ngam ioh shuh ban kren ha ka kyrteng jong ka seng VPP hynrei ngan nang iai kren pat ha ka kyrteng Voice of the People ne sur jong u paidbah.  U Paidbah um dei ban klet ba ha ka por ba nga rung sha ka VPP nga rung ha ka nongrim bad nga khlem rung ruh ban pan tiket. Nga rung bad nga ong ia ka VPP ba lada ka pdiang ia ka Reservation Policy ngan rung sha ka VPP bad kila ong hooid”. “Ma ki kiba pynkhein ia ka jingiakut. Ka State Reservation Policy kam dei ka ishu ka jong u Bah Adelberth Nongrum, kadei ka ishu jong ki samla bad ka jylla, hynrei balei na ka liang ka seng ka ai jingmut sha ka State Exepert Committee tang ia ka Job Reservation on Population. Nga lah kylli ia ki, shaei ka Academic Reservation bad shaei kata ka Roster kaba ngi dawa ba kadei ban treikam noh nangne shakhmat ym da kaba treikam naduh mynshwa. Ngi hap ruh ban rah ia ka mat halor ka Creamy Layer, kumno u khun jong u MLA un iakhun pyrshah ia u khun uba die waidong haka Reservation Policy balei ka party kam sngewthuh sieh, ki don ki riewstad ki riewnang, ki don ki riewheh kyrdan, hynrei kadei tang kawei ba kim kwah ia nga uba kren ba ngan iai kren” ula ong.

 U Bah Adelberth ula pynshai, “Balei nga leit iaid lait, lada ia ka jingiatehkular jong ka jaidbynriew la pynkhein kumno ngan shaniah pat ia ki. Nga khlem mih na ka party ne leh ia kaei kaei kaban pynbudnam ia ka party hynrei nga leh ia kiei kiei ban wanrah bad ban kyntiew ia ka jylla bad ia ka jaidbynriew bad ban iohnong ruh ka VPP. Wat nym ialam bakla, ngam long uba ialeh pyrshah ia ka seng hynrei nga dei uba ieng pyrshah tang ia ka rukom treikam namar ki iaid lait na ka riti treikam jong ka seng, dei ma ki kein kiban sngewthuh ban bishar bad ngam dei ma nga uba pynkhein iaka riti treikam ka seng”.