Pynkup burom ka IIM Shillong ia 475 ngut ki samla pule

Ka IIM Shillong hynne ka sngi kala pynlong ia ka Convocation kaba 16 jong ka, ha kaba la pynkup ia ka kyrdan pule sha ki 475 ngut ki samla pule kiba kynthup ia ki 381 ngut kiba la pyndep ia ka Post Graduate Programme 2023-25, 54 ngut ki samla kiba la pyndep ïa ka Post Graduate Programme for Executives (PGPEx) 2024–25 bad 35 ngut kiba la pyndep ia ka Post Graduate Programme for Working Executives (PGPWE) 2023–25 bad 5 ngut ki scholar kila ioh ia ka kyrdan Doctor of Philosophy (PhD). U Myntri Rangbah ka jylla u Conrad k Sangma haba kren ha ka Convocation ula kyntu ia ki samla pule ba kin shim ia ka jingim kum ka jingmareh thong (Marathon). “Kane ka dei ka marathon. Wat ailad ba kano kano kan pynthud noh ia phi. Haba phi iaid shakhmat ha ka jingim, phin mad ia ki jingeh bad ia ki jingtynjuh kiba bun jait. Kane kadei ka khyllipmat kaba kongsan bad kumno phi leh ia ka, kadei kaei kaei kaban batai ia ka jingiaid lynti ka jong phi” ong u Conrad.

Ula pynpaw ruh ia ka jingmad ka jongu ha ka por ba u rem ha ka elekshon hynrei hadien pat ula lah ban pynkylla na ka jingrem sha ka jingai mynsiem ban poi sha ka jingjop. “Nga la rem ha ka elekshon kaba nyngkong, hynrei nga la ioh jinghikai pat na ka jingpulom ka jong nga. Hadien nga lah jop, nga lah long u MP, u MLA, u Myntri ka tnad Pla Tyngka bad mynta kum u Myntri Rangbah. Ka jingshim ia ka rai kaba kongsan tam ha ka jingim ka long kaba eh tam, hynrei haba phi bud ia la ka jingngeit kaba don ha ka dohnud bad leh ia kaei kaei kaba phi da ngeit shisha, kumta ka jingiaid lynti ka long kaba don jingmut” ula ong. Haba kren shaphang ka jinglong nongialam bad ka jinglong briew, u Myntri Rangbah ula ong “Kam myntoi lada phi stad katno katno ruh ne phi pyndep ia ka jingpule na kano kano ka jaka pule, ha kaba kut ka sngi hi, kadei ka jinglong briew kaba long kongsan tam hi. Ka jingrkhie ne ka jingleh bha kan pynkylla ia ka jingim briew”.

Ula iathuh ruh ba ia ki jingmut jingpyrkhat, ki jingpule jongu ha ka Business School ula lah ban pynwandur ia ki kum ki polisi kuba ula lah ban pyntreikam. “Wat ju kheiñ sting ïa ka jingkordor jong ki jingïakren, ki jingïakynduh bad ka jingioh ia ka lad ban ïoh ha ka jaka pule kaba pawnam kum ka IIM Shillong. Ka jingnang jingstad kaba phi ïoh hangne ka don ia ka jingmut kaba khraw na ka bynta ka lawei ka jong phi, kumba kala long ia nga ruh”, la ong u Conrad.  U Conrad ha kane ka sngi ula aiti ia ki takma sha ki samla pule kiba la wan shakhmat ha ki jingpule ha ki kyrdan bapher bapher ha kaba la iadonlang u President jongka Honeywell India u Ashish Modi, u Chairman jongka Board of Governors ka IIM Shillong u Shishir Kumar Bajoria bad u Director ka IIM Shillong u Prof D P Goyal bad kiwei kiwei