Plie u MR ia ka rynsan Digital ban pyntreikam ia ka DRMS ia ki lanot lynshop mariang

U Myntri Rangbah ka Jylla u Conrad K. Sangma hynne ka sngi ula plie ban pyntreikam ia ka Disaster and Relief Monitoring System (DRMS) kum ka rynsan digital ban pynsuk ia ka jingpyntip haba don ki jingjia lynshop mariang ha ka jylla. Haba kren ha ka jingialang u Conrad K Sangma ula ong, ka long kaba donkam ban don ia ka rukom treikam ba sted, ba shai kaba don ruh ia ka jingkitkhlieh na ka bynta ki shnong kiba shah ktah ha ka jingshah pynjulor ha ka bor mariang. Ula ong, ba ka DRMS kan pyntikna ba ka jingiarap kan poi sha ki longiing kiba mad iaka jingshah julor bad kane ka rukom treikam ba thymmai jongka tnad Revenue & Disaster Management ryngkat ka jingiatrei lang bad ka NIC Meghalaya, kan long kum ka rynsan ba kongsan ban pyniaid beit shakhmat ia ki kam ai jingiarap jongka State Disaster Response Fund (SDRF) bad ka National Disaster Response Fund (NDRF).

Ha kane ka jingialang plie ia ka DRMS la iadonlang ki heh ophisar ka jylla, Deputy Commissioner bad ki nongmihkhmat na ki tnad sorkar bapher bapher. Ha kane ka rynsan digital jong ka DRMS yn kynthup ia ka jingpyndonkam ia ki kor teknoloji ban kyntiew iaka rukom phaikhmat halor ka jingjia ba shah lynshop ha ka bor mariang ha ka jylla Meghalaya. Ban peit bniah ia ki jingjia ba sngewsih ha kylleng jong baroh ki District bad ki Block ka ban pynbha bad pynjanai ia ka rukom treikam, ban don ka jingiatrei lang kaba iajan hapdeng ka ophis u Block Development Officers (BDO) ki bor pyniaid District bad ka tnad Revenue & Disaster Management ban pynthikna ba kan don ka jingai jingmynjur kaba kloi.

Nalor kane kan don ruh ka jingtreikam kaba janai ha kaba iadei bad ka Public Financial Management System (PFMS) ban pynpoi ia ka pisa sha kiba dei ban ioh bynta bad ban ai ia ki jingtip kiba thikna bad jingkhmih bniah na ka bynta ban don ka rukom pynkhreh kaba janai bad ia ki polisi treikam. Ha ka DRMS kan kynthup lang ia baroh ki jingshah pynjulor ha ka bor mariang naduh ka jingshlei um, jingtwa khyndew, ka eriong bad u jumai ban pynthikna ia ka jingpyntreikam kaba ryntih, ki bor pyniaid district bad baroh ki tnad sorkar kiba donbynta lang kin hap ban leit ban ioh jinghikai ban pyndonkam ia kane ka rukom treikam jongka DRMS.