Ïoh u Prof Tanie bad ka kynhun ïaka ‘Best of Indian Journal of Ophthalmology Award’

U Prof Tanie Natung bad ka kynhun jong u na ka Hospital NEIGRIHMS ki la ïoh pdiang ïa ka khusnam ‘Best of Indian Journal of Ophthalmology Award’ ha ka 40th Asia-Pacific Academy of Ophthalmology Congress haka jingiatreilang bad ka 83rd Annual Conference jong ka All-India Ophthalmological Society kaba la long 3-6 tarik Iaiong 2025 ha New Delhi Palat 13500 ngut ki nongwan na ki ri bapher bapher ki la iashim bynta bad iasam ia ki jingtip halor ka Science, ki jingshem, ki jinghikai bad ki jingmih na ki jingwad bniah ha kane ka jingialang ba la pyniasoh lang jong ka APAO-AIOS.

Ia kane ka khusnam la ai na ka bynta ka jingpule wadbniah kaba la ianujor ia ar tylli ki buit ha kaba jied ia ka rukom khein ia ka bor lens kaba biang tam na ka bynta ki jingpang cataract da kaba pynbha ia ka jingmih jong ka jingpeit na ka bynta ki nongpang kiba duna eh ki jingbakla.  U Prof Natung u la bynrap ba kane ka jingwad bniah kan ïalam thikna ïa ki doktor khmat ha kylleng ka pyrthei ban ai ïa ki jingmih kiba bha tam ha ki jingsumar khmat. Ka Dr Ishita Pandey, Dr. Benjamin Nongrum bad ka Dr. Ester K Sekhose na ka tnat sumar khmat jong ka NEIGRIHMS ki la pynlong ia kane ka jingpule ba la ialam bad ialam lynti da u Prof. Tanie Natung

Naka liang u Director ka NEIGRIHMS, u Prof Nalin Mehta u la ai khublei ïa u Prof.Tanie Natung. Ka Indian Journal of Ophthalmology ka long ka thup jingthoh kaba pawnam bha bad kaba la pynphriang bha bad kaba don ka jingktah kaba bha hapoh ka thain. Ka Asia-Pacific Academy of Ophthalmology ka dei ka kynhun kaba heh tam jong ki doktor khmat jong ka thain Asia Pacific & ka All India Ophthalmological Society ka dei ka kynhun kaba heh tam jong ki seng sumar jong kano kano ka jait jingsumar kaba don kumba 27000 ngut ki dkhot ha kane ka por.