Soi Soskular ka Sorkar bad ka AAI halor ka Baljek Airport

Ka sorkar jylla ka la iasoi ia ka Memorandum of Understanding (MoU) bad ka Airport Authority of India (AAI) ban pyniaid bad ban khmih ia ka Baljek Airport kaba don ha West Garo Hills. Lyngba kane ka jingiasoi ia ka MoU ka AAI kan pyniaid ia ki liengsuin kiba don 20 tylli ki jaka shong ne 20 seater Aircraft bad ban pyniaid shakhmat ia ki kam ban ioh ia ka lisen ban pyniaid ia kane ka kad liengsuin. Ka Sorkar jylla kala iasoi ia ka jingiatehkular bad ka AAI halor ka Operation and Maintenance (O&M) and Communication, Navigation & Surveillance/Air Traffic Management (CNC/ATM) ban pyniaid ia ka kad liengsuin ban sdang pyniaid ia ki liengsuin ne 20 Seater Aircraft.

Ka jingthmu jong ka Sorkar Jylla ka long ban pyniar ia ka kad liengsun ban lah ban pdiang ia ki liengsuin kiba heh ia kaba ka jylla ka dang iaid ban ioh shna pynheh noh ia ka kad liengsuin ban ioh sdang pyntreikam ia ki ATR-72. Ka AAI kala phah ia ka Detailed Project Report (DPR) kaba la pynkhreh ha u snem 2010 bad 2017 bad kumta ka sorkar kala shim shuh shuh ia ka jaka kaba 56.5 akar. U Myntri Rangbah ka Jylla u Conrad K Sangma, ula ong ba kane kadei ka sienjam ba kongsan bad ula kular ba ka sorkar ka kut jingmut ban kyntiew kyrdan ia ka Kad Liengsuin khnang ba yn lah ban wan hiar bad her ki liengsuin kiba heh kum ka ATR-72.

Ula ong ba ka jingsdang ban pyntreikam ia kane ka kad liengsuin kan wanrah ia ka jingkylla na ka bynta ki paidbah ka thain bad ka Jengjal kan sa kylla long kum ka jaka kaba kongsan bad ka jaka pdeng ha ka rilum Garo. U Myntri Rangbah ula kyntu ruh ia ki paidbah ba kin ai ka jingiatreilang ha kaba iadei bad ka jingshim ia ka jaka ban pyniar ia ka kad liengsuin namar ka jingiohi jngai jongka sorkar kam dei eh ban pyntreikam noh mardor hi ia ki liengsuin hynrei kadei ba kan treikam syndon da ki phew snem.