Julor ki khyrdop ka JHADC ba ñiom paidbah ka JNC bad JSU

Ki artylli ki khyrdop jong ka JHADC mynta ka sngi kila julor hadien ba ki sengbhalang ba kynthup iaka JNC bad JSU kila ñiom daka bor iaki khyrdop bala khang tala, haka jingiakhih ba kila pynlong mynta ka sngi da kaba leit tur sha ophis JHADC ba don ha Jowai ban dawa pyndam syndon noh iaka NOC ka Shree Cement kaba thmu ban tih mawshun ha Lum Shyrman jong ka Elaka Nongkhlieh, East Jaiñtia Hills District haka jaka ba heh kumba 652 hectare.

Ia kane ka jingiakhih ka seng JNC bad JSU kila sdang na madan dai masi Ladthadlaboh da kaba iaid kjat ha ryngkat ka jingrah placard bad pyrta dawa iaka JHADC ban pynduh pyndam noh iaka NOC jong ka Shree Cement, nangta ban dawa weng noh ia u Dolloi ka Elaka Nongkhlieh bad ban pynioh biang iaka hok ki nongrep bad trai jaka ha Lum Shyrman, kumba kila dep pynpaw jingpyrshah wat haka public hearing kaba la long haka 22 tarik u bnai May 2026 haduh ba naka liang u DC ruh ula hap ban pyndam noh ia public hearing ha katei ka sngi.

Ha kane ka sngi haba ki nongialam JNC, JSU kila poi ha khyrdop JHADC la don lypa ki pulit ba ieng ban khanglad iaki ban rung shapoh, ha kaba naka liang ki nongialam sengbhalang kila kyntu iaki pulit kumjuh ki magistrate ba kin ailad iaki ban rung shapoh phyllaw namar ba ka jingthmu jong ki ka long ban pynlong jingiakhih ba jai jai hapoh phyllaw ka Council.

Hynrei hadien katto katne por ka jingiakren bad ba ym shem la plie ia u tala, kumta ki sengbhalang kila pyni bor da kaba ñiom pynkhynñiuh iaka khyrdop ka JHADC. Bad namar ba naka liang ki pulit ruh ki khlem ialeh pyrshah ne khanglad iaki haka por ba ki ñiom iaka khyrdop, tang hapoh 3 munite ka jingpynkhynñiuh ka khyrdop kala lait ba kila ioh rung sha phyllaw.

Ynda ki la ioh rung shapoh kila leit ñiom sa ia kawei pat ka khyrdop ka ban kiew shaka building thymmai ka haduh ba kala julor.

Hadien kane ki la ialum jingialang hapoh phyllaw ka JHADC ha kaba la shim bynta ban kren naduh u President ka JSU u Jersome Shylla, u President JNC u Sambormi Lyngdoh , u Reachingson Siangchai social activist lem ki paidbah nongrep bad kiba don jaka ha katei ka thaiñ Lum Shyrman.

Kiba ai jingkren kila pynpaw ka jingpyrshah jur ia ka jingthmu ka Shree Cement ban tih mawshun ha Lum Shyrman da kaba ong dei ka jinglehbor iaka hok ki nongrep bad ki trai jaka kiba la im ja daka rep ka riang, namar ki jaka jongki kin sa shah ktah.

Ki ong ruh ba u Dolloi lem ki dkhot Elaka kila leh donbor iaki jaka jongki da kaba bynda shaka Shree Cement wat haba kila don iaki kot ki sla.

Ha kajuh ka por ruh ki ong ba lada ka Shree Cement ka iaid shakhmat iaka par mawshun wat ki jaka ba donnam ha ka thaiñ kum ka Krem Sutiang kaba juh rieh u Kiang Nangbah khla wait ka Rilum Jaiñtia ka bym da jngai shuh ruh kan sa jah.