Khring ka tamasa Sohtrun  ia ki paidbah ha Delhi U Sohtrun Meghalaya ba bang tam, ka jaka rep yn pynheh haduh 1 lak Hectar: Jyotiraditya Scindia

Ka sorkar Meghalaya ka la pynlong ia ka tamasa die Sohtrun ba lai Sngi ha Dilli Haat, New Delhi ha ka sien basaw ban kyntiew ia ki nongrep ka jylla ba kin ioh ka Iew ba kham biang ban die ia ki mar rep shabar jylla.

Ia kane ka tamasa die Sohtrun ha Dilli Haat ba lai Sngi naduh 10 haduh 12 tarik Naitung la plie da u Myntri sorkar pdeng ka tnad DoNER u Jyotiraditya Scindia ha ka jingdonlang u Myntri Rangbah ka jylla u Conrad Sangma ki ophisar ka tnad Agriculture, Horticulture bad ki nongrep na jylla Meghalaya.

Haba kren ha ka jingialang u Scindia ula ong, ka Meghalaya ka kiew ha ka rep ka riang bad ka la pynmih u Sohtrun haduh 1.41 metric ton ha ka jaka rep ba 12 hajar hectar, kata ha Ri Bhoi, Khasi bad Garo Hills.

“Ka sorkar kan pyrshang ki lad ki lynti ban pynkiew ki jaka rep haduh 1 lak hajar hectar ha ki snem ban wan ban kyntiew shuh shuh ia ki nongrep” ula ong bad bynrap u Sohtrun na Meghalaya u ba thiang bad shngiam.

Kham shwa u Myntri Rangbah Conrad Sangma haba ai jingkren ula pynpaw ba kane ka dei ka tamasa ba heh tam na ki snem ba la dep ban kyntiew ia ki nongrep ka jylla Meghalaya.

Ka jingthmu ka sorkar ban pynlong ia kane ka tamasa ka long ban plie lad ia ki nongrep bad ki nongseng kam lajong ban pyniaid iew ia ki mar rep bad ki nongshna tiar tynrai ki Self help group (SHG) ban die ia ki mar rep nalor u Sohtrun kynthup ki tiar thain tynrai, umngap, ashar, shynrai bad kiwei kiwei.

La iathuh yn die kumba 25 metric ton u Sohtrun na Meghalaya kynthup na Ri Bhoi, Khasi hills bad na Garo Hill, la khmih lynti ba Iew kan shongshit ha kaba ki paidbah na kylleng ki jylla ki wad ban mad ia u Sohtrun ba bang ba shngiam na Meghalaya.

Kane tamasa Sohtrun ka la khring ia ki paidbah na kylleng ki jylla ban mad bad thied ia u Sohtrun na jylla Meghalaya bad la sakhi ka Iew Sohtrun ka shongshit bha hynne ka Sngi sdang ka tamasa Sohtrun ne Pineapple festival 2026.