Dawa ka HYC ban pyntreikam mardor SADE ban ïakhun pyrshah drok

Ka Hynniewtrep Youth’ Council (HYC) ka la dawa ba dei ban pyntreikam mardor ïa ka Special Anti-Drug Enforcement (SADE) ban ïakhun pyrshah ïa u drok ha baroh ki jaka kiba la ithuh ba kidei kiba jyllei u drok hapoh ka nongbah Shillong.

U President ka HYC u Bah Roy Kupar Synrem ula pynpaw ba ka seng ka dawa jur ba ki pulit kidei ban iaid pahara man la ka por ha ki jaka kiba jyllei u drok bad ban leh da kaba tyngeh ia ki nongkhaii drok bad khamtam ban don ia ka rukom treikam ne ka Pan kaba shai kdar ban ai jingshngain biang ia ki jaka paitbah.

Ka HYC kala kynnoh ba ka jingbym leh eiei ka Sorkar kala pynjyllei ia ka kam khaii drok ha Shillong, khamtam eh ha Police Bazar, GS Road, Lum Survey bad ki jaka ba marjan, ha kaba la bna ruh ba ki nongdih bad ki nongkhaii drok ki pyniaid ia katei ka kam be-aiñ khlem jingtieng ia ka aiñ ne ia ki paidbah.

Ka HYC kala ong, ba dang shen la paw haki lad pathai khubor, ba ki jaka khaii pateng kila shah pynthud, ki nongthied kila shah beh bad ki jaka paidbah ki kylla long ki jaka dih drok bad ki kam kiba long pyrshah ia ka imlang sahlang bad kane ka jinglong jingman ha Nongbah Shillong kadei kaba don jingma bha.

Ka HYC kala kynnoh ba ki nongkhaii, ki nongdie jingdie, ki kynthei, ki khynnah bad ki nongshong shnong ki shah pynbor ban im bad trei hapoh ka jingtieng katba ka Sorkar ka dang iai bteng ban long kum ka nongpeitkai bad ka sngap jar.

“Ka jingpyndonkam paidbah ia ki drok haba shit ba shai, ka jingdon jong ki nongdih drok ha khmat ki dukan bad ki jaka khaii, ka jingshah pyndik, jingshah tuh bad jingshah pyntieng pynsmiej ba la iathuh da ki nongdie dukan kiba iakynduh man la ka sngi, ka pyni shai ba kane kam dei shuh ka jingeh kaba ha rieh hynrei ka dei ka jingeh kaba pyni ba ka nongbah ka don hapdeng ka jingbym don aiñ” la kynnoh ka HYC.

Ka HYC kala kynnoh ba ka Sorkar Jylla, ka tnad kam pohiing bad ki bor aiñ kidei ban shim iaka jingkitkhlieh ba ki ailad ia kane ka jingma ban saphriang khlem da peit bniah, kumta ka jingbym lah ban tehlakam ia ki jaka ba jyllei drok ka pyni ba ka Sorkar kam don jingkitkhlieh ban weng ia kane ka jingeh kaba mih namar ka jingjyllei u drok. Kumta ka Sorkar kadei ban shimkhia bad ban leh da kaba tyngeh mardor, hashuwa ba ka Shillong kan liat bad ba ka imlang sahlang kan shah pynjot.