Ïap 5 ngut ki nongbylla katba dang pynkhuid pung ha Lapalang

Ha ka janmiet jong ka 10 tarik u Naitung, ha ka por kumba 7:30 janmiet, 5 ngut ki briew ki la iap ha kawei ka pung kaba jylliew kumba 25-30 phut haka shnong Lapalang, East Khasi Hills.

La iathuh ha kine ki briew ki rung shapoh kane ka pung ban pynkhuid bad ban sei noh iaka um ba jaboh kaba lang ha kane ka pung.

Haba pynthikna ia kane ka jingjia ba sngewsih, u Rangbah Shnong ka shnong Lapalang u Bah Pyndap Sohtun u la iathuh ba ka daw ba ki 5 ngut ki iap hapoh pung ka lah ban dei namar ba ki pyndonkam da ka Diesel Pump ban pynkhuid bad ban tan iaka um ba jaboh napoh ka pung.

U Bah Pyndap ula iathuh ba lehse ki lanot kiba don hapoh ka pung kaba jylliew kumba 25-30 phut ki ioh ring mynsiem da ka lyer bih ba khleh lang bad ka Diesel namar ka jingduna ka Oxygen shapoh ka pung.

U la iathuh ba haka por jia kane ka jingjia ba sngewsih, ki don 4 ngut shapoh ka pung katba uwei pat u la ioh ban mih ban pan jingiarap naki bad sah marjan bad 3 ngut ki la khlad hashen.

U la iathuh ba ki 2 ngut kiwei pat kiba la khlad ki dei kiba sah marjan ha katei ka iing kiba mut ban leit iarap iaki 3 ngut ba kyllon hapoh pung.

U Superintendent of Police (SP) East Khasi Hills ula pyntip ba ki 5 ngut kiba khlad ki kynthup 3 ngut ki Khasi bad 2 ngut naka jaidbynriew Nepali kiba sah marjan.

U SP ula iathuh ba iaka met jong ki lanot la ioh sei daka kynhun ai jingiarap ka Search and Rescue Team bad la pynkit noh sha NEIGRIHMS Hospital ban leh iaka ba donkam.

Ki Pulit kila Register Case hapoh Rynjah PS Police Station, Case No.106(1)/125(a) BNS R/w Sec 51(b) Disaster Management Act 2005.