Shah kem samla ba khyllied skirt ia ka khynnah skul ha Umohsun

Ki pulit ka jylla ha ka sngi Balang ka 28 tarik Jymmang, ki la ioh kem ia u runar uba la leit khyllied ia ka skirt jong kawei ka khynnah skul ha Umsohsun. Katkum ka kyrwoh khubor na u Superintendent of Police (SP) ka East Khasi Hills u bah Vivek Syiem, la ong ba une u runar la tip kyrteng kum u Himan Gogoi 24 Snem bad la iohkem ia u na Jorhat, Assam. Ka khubor na u SP ka la iathuh ba kane ka jingleh khlemakor jong une u runar ka la jia ha ka 23 tarik Jymmang ha ka por 6:35 mynstep ha Umsohsun ha ka lad ban leit sha YMCA. Ha ka 24 tarik Jymmang hadien ka jingsaphriang ka video ha ki rynsan social media ha kaba uwei u runar uba la deng ia ka jingsopshyntur ne ka mask, ula la leit ban khlied ia ka skirt jong ka khynnah skul bad shondur da ka mobile, ki pulit Special Team ba la ialam da u Additional SP ka EKH u bah Ivan B. Diengdoh na bynta ban  ithuh dur khmat bad kem ia utei u runar.

Ki pulit Special Team hadien lai sngi ba ki la ithuh ia ka dur khmat jong utei u runar mar mar hapoh ka jingialam ka kong Lavinia Khongwang ha ka 28 tarik Jymmang ryngkat ka jingiatreilang bad ki pulit ka Lahdiogarh Outpost ka Jorhat ki la pynlong ia ka jingleit khynra bad ki la leit ban kem ia u Himan Gogoi na iingsah ki bahaiing jong u ha shnong Bamkukurachua kaba hap ha Teok Police Station. Ha kane ka jingkhynra ki pulit ki la kem ia u bad la kurup ruh ia ka mobile phone jong u bad ia kiwei ki sakhi satar. Katkum ka jingong u SP, u Himan Gogoi udei uba la sha ujor ha Teok Police Station hapoh ki kyndon ain BNS Act.

Ia u Himan yn rah sha District Court, Jorhat ban tian bishar bad hadien ba la ioh jingbit yn sa rah sha iing kashari ha Shillong na bynta ban tian bishar. Shuh shuh ka khubor na u SP ka ong ba une u runar udei uba ju mlien ban leh ia kine ki kam bad ar tylli ki ejahar la ujor kaba kynthup kawei ha Lumdiengjri Police Station hapoh ki kyndon ain POCSO Act bad kawei ha ejahar la ujor ha Sardar Police Station hapoh ka ain POCSO hadien ba kawei ka khynnah ka la shah leh khlem akor ha une u runar kaba la jia ha ka 19 tarik Jymmang ha ka por kumba 7:15 ne 7:30 mynstep.