Jurip u MLA ban shna Sub-Centre ha shnong Sabahmuswang bad Ialong

U MLA ka Jowai Constituency u bah Wailadmiki Shylla hynne ka sngi ula leit jurip ia artylli ki jaka ha ki artylli ki shnong ba hap hapoh ka constituency jong u na ka bynta ban shna noh ia ki jaka ai jingsumar ne Sub-Centre ba la dep mang kum shibynta ban pynjan ka jingshakri sha ki paidbah haba iadei bad ka koit ka khiah. Kine ki artylli ki Sub-Centre kynthup kawei ha shnong Sabahmuswang bad kawei ha shnong Ialong, bad ha kane ka jingleit jurip jong u la donlang ki waheh shnong ki dkhot nongialam shnong lem bad ki ophisar napoh ka tnat National Health Mission, West Jaiñtia Hills District. Haba kren sha ki lad pathai khubor u MLA u ong ba u dap da ka jingsngewkmen namar haduh kumba long mynta sa tang kine hi ki shnong hapoh ka constituency jong uba la long biang ban ioh ia ka Sub-Centre kin sa ioh noh shen.

U kyrmen ruh ba lyngba ka jinglah ban shna ia kane ka Sub-Centre kan pynmyntoi iaki paidbah haka pang ka shitom khamtam iaki longkmie armet naka bynta ban sumar iaki jingpang ba dang lah ban sumar ha ki Sub-Centre. Haba iadei bad ka jingpyntrei u ong kaba sah mynta sa tang ban pyndep iaki kot ki sla naka bynta ban ioh sdang trei noh haki khyndiat  bnai ban wan da kaba khmih lynti  la kumno kumno hapoh 2 snem yn lah ban pyndep.

Ha kajuh ka por u iathuh ba la don ruh ka  jingkyrpad naka liang ki waheh shnong  ba wat iaki birth bad death certificate ruh dei ban ioh noh naki sub centre. Halor kane ka bynta u kular ban rah iakren hapoh ka sorkar namar ba kane dei ka bynta ba kham halor kaba dei lang ia baroh.