Shah weng kam bad pynhiar kyrdan bun ki nongtrei ha KHADC

Ki samla ba la shah wengkam bad kiba shah pynhiar kyrdan na ka kam ‘Permanent’ sha ka ‘Casual’ ha Khasi Hills Autonomous District Council (KHADC) hynne ka sngi ki la leit kyrpad ia u Chief Executive Member (CEM) Bah Shemborlang Rynjah ban khmih biang ia ka rai bad pynneh ia ki ha ka kam ba ki ju trei baroh shikatta hapoh ka Council. Kine ki samla ba la shah weng kam bad shah pynhiar kyrdan ki la leit iakynduh ia u CEM ban pan jingpynshai halor ka jingshah weng kam bad shah pynhiar kyrdan, hynrei ki la pynpaw ka jingsngewsih ba u CEM ula ong, “Kaei ba ngi lah rai ka dei ka rai” bad um shym la ai kano kano ka jingkular ban pyrkhat ne pynkylla biang ia katei ka rai ba la dep pynbna wat hadien ba ki la kyrpad un pyrkhat lem ia ki khamtam haba ki la don la ka longiing hynrei u CEM ula ong ba um lah ban leh eiei shuh. Uwei na ki samla ba shah pynhiar kyrdan ula ong, “Ngi lah trei la 6 snem hapoh KHADC hynrei ngi kyndit ban phah wan shim ia ka hukum ne Order na ka tnad Establishment bad la shem ba ngi lah shah pynhiar kyrdan na ka kam Permanent ba ngi trei sha ka Casual, ngim shym leh bakla bad ngi lah ai ka jingshakri ba bha tam ia ka Council bad ngi kwah ka EC kan pyrkhat thymmai biang halor kane ka rai bad ngi kwah kum ki nongtrei ba pura ym kum ki Casual”.

Ula bynrap ka stieh ka lah ap lypa ha ryndang, namar ngi sngewthuh lada ngi trei kum ki Casual ka jingsiew kam thikna bad katno ngin ioh bad ngi sngewsih bad kthang ka mynsiem halor kane, ngi baroh ngi la shim ram na ka Bank namar ngi wan na ki longiing baduk, ngi lah ioh NOC na ophis hynrei naei ngin siew ia katei ka ram mynta.“Ngi ruh ngi dei ki khun samla ka ri, phi ialeh na ka bynta ki khun samla ka ri mynta phi knieh ia ka kam ka jong ngi ki khun samla ka ri, ngin phai shaei, ngin khmih lytni iano mynta. Ngi kwah ia u CEM ba yn shim biang ia kane ka rai ban pynneh ia kaei kaba la don lypa mynta, hynrei ia kaei kaba i kwah ban leh nangne shakhmat ia ka polisi ka jongki, ai ba kin iaid la ka jong namar ngim sngew iahap ia kane ka jingleh ka jongi” ula ong bad ka bynrap “Hapoh ka District Council kam ju don kata ka interbiw ne ka jingleh eksamin hynrei ia baroh khoit la shu thep da mano re mano bad balei weng tang ia ngi. Lada phi kwah ban weng, weng lut syndon ia baroh” kila ong.

Ki la ong, kane ka jingleh ka EC kam iahap bad ka buh ia ki ha ka jingeh kaba khraw khamatm ba bun na ki, ki la heh ha ka rta bad kin shem jingeh ban leit wad kam shawei pat bad kam pat ju don ruh kano kano ka jingjia kiba trei Permanent kin shah thung kum ki Casual” ki la ong. Ngin ieng skhem ban dawa ia la ka hok ban pynneh kum ki nongtrei Permanent bad kumjuh ruh ban dawa kiba la shah beh kam dei ban pynneh biang bad kin sa wad ki lad ki lynti wat ban leit mudui sha iingkashari ban dawa ia la ka hok.