Ka jingshisha kan sa paw ynda la wanrah ïa ka Sonam ha Shillong : SP

U Superintendent of Police (SP) ka East Khasi Hills u bah Vivek Syiem ula iathuh ba lyngba ka kaiphod jong ka post mortem, u Raja Raghuvanshi u la shah mait da ka wait ne kynja ba nep na ka bynta shadien jong ka khlieh bad na ka bynta shakhmat ka khlieh. Haba kren sha ki lad pathai khubor hynne ka sngi, u bah Vivek Syiem ula ong, “Katkum ka kaiphod Post Mortem na NEIGRIHMS, ka la pyni ba don ar tylli ki jingshah mait da ki kynja ba nep na bynta ka khlieh kawei na shakhmat bad kawei na shadien.” Katkum ka post-mortem ka dei ka jingpynkhreh lypa ban leh ia kane ka kam ban pyniap beit mardor hangto hangto hi. Ka tyllong khubor, la iathuh ba la pyndonkam da ki tiar ba nep kaba lah ban dei ka wait kaba la wanrah na Guwahati ban pyndep ia ka jingim u Raja.

U Superintendent of Police, East Khasi Hills, u bah Vivek Syiem, kham mynshwa ula pynthikna ba ki pulit kila lum ia ki sakhi satar kiba dei jong ka lok u Raja, ka Sonam kaba la suba donkti kum kawei kaba iadon bynta ban iasuh buit halor kane ka kam sniew ryngkat u samla rieh jong ka, u Raj Singh Kushwaha bad kiwei. “ Baroh ki sakhi ba la ioh lum, ka kdew ba ka la don lypa ka jingpynkhreh ban leh ia kane ka kam, hynrei ia kane, yn sa lah ban pynshisha haduh ban da la wan ialam ia ki sha Shillong na bynta ban tohkit bniah,” ong u SP u bah Vivek Syiem. Ula ong ba ka jingtohkit ka dang iaid bad kan long kaba kham bniah ynda la wanrah ia ki sha Shillong ban leh da ka Special Investigation Team (SIT).

Lah ban kdew ba ia ka met u Raja Raghuvanshi la lap na shiteng ka arliang riat hajan ka parking Wei Sawdong ha ka 2 tarik Jylliew naduh ba u la jah rngai ha ka 23 tarik Jymmang,2025. Kum ban shu kdew ba ki pulit ka jylla ha ka 3 tarik Jylliew, ki la lap ia ka wait (Dao) na ka jingjngai kaba tang kumba shi kilometre ne ar kilometre eiei na ka jaka ba lap ia ka metiap u Raja Raghuvanshi.