Ka Lari Girls Hostel, ka hostel private kaba nyngkong ha Pyndengumiong

Haka sien kaba nyngkong eh, la plie paidbah ïaka Private Hostel haka shnong Pyndengumïong Mairang bad ïa kane ka Hostel ba la long trai da u bah Charles Warjri la tip kyrteng kum ka ‘Lari Girls Hostel’. Ïa kane ka Hostel kaba dei kyrpang tang naka bynta ki khynnah kynthei la wan ban plie da u sordar jong ka shnong Pyndengumïong u bah Bornard Syiemiong haka jingïadonlang u General Secretary u bah Lambok Nongrang, ki secretary jong ki Dong kiba pher bapher kiba don hapoh ka shnong Pyndengumïong, u Principal ka Mairang Presbyterian Higher Secondary School u bah Comfort War, kiba ha ing ha sem u bah Charles Warjri nalor kiwei kiwei kiba la shah khot sngewbha.

Ki trai kiba pyniaid ïa ka Lari Girls Hostel kila iathuh ba kane ka Hostel ka ngiam kumba 30 ngut ki khynnah bad kino kino kiba kwah ban sah ha kane ka Hostel kin siew tang 5000 tyngka shi bnai kaba la kynthuplang ïaka bam. Ha kane ka Hostel la pynbiang ruh iaka internet naka bynta ki samla pule College lada ki donkam iaka internet naka bynta ka jingpule.

U bah Bornard Syiemiong haba kren ha ka jingialang plie, ula ong ba ha kane ka juk la donkam khambun ki hostel namar ki hostel ki dei ki jaka sah kiba shngain naka bynta ki khynnah bad ki samla pule. U la ong ba ka jingdon ki 3 tylli ki college bad katto katne tylli ki Higher Secondary School ha Mairang kala pynlong ba daki phrew hajar ngut ki samla pule na kylleng ki jaka ki wan ban pule sha sor Mairang bad ka jingdon ki hostel kan iarap iaki ba kin ioh iaka por khreh kot kaba biang namar kim donkam shuh ban trei kam kumba ki sah haki ing wai.