Leit jurip ka Myntri Sorkar Pdeng ia ki rukom pyntreikam ki skhim ha WKH

Ka Myntri Sorkar Pdeng ba dei peit ïa ka Ministry of Health & Family Welfare bad ka Ministry of Chemicals & Fertilizers, ka Anupriya Patel, ka la wan ban jurip ia ka West Khasi Hills District ban peit bniah ïa ki skim sorkar pdeng bapher bapher kiba la pyntrei hapoh ka district. La pdiang burom ïa ka Myntri da u bah Garod L.S.N. Dykes, IAS, u Deputy Commissioner ka West Khasi Hills ryngkat bad ki Additional Deputy Commissioner (ADC), ki Block Development Officer (BDO) Superintendent of Police bad ki heh sorkar na ki tnad Sorkar kiba pher bapher.

Ka Smt. Anupriya Patel nyngkong eh ka la leit sha ka shnong Khyllem Tiehsaw ban jurip bad peit bniah da lade ïa ka jingpyntreikam ia ka Jal Jeevan Mission hapoh katei ka shnong bad ka la pynpaw ka jingsngewkmen halor ka rukom pyntrei ïa kane ka skim, ha kaba la lah ban ai um sha man ki longing ha ka shnong. Ka la leit ruh ban jurip ïa ka jingpyntreikam ia ka MGNREGS bad ka skim PMAY-G ha ka shnong Sohpian. Hadien kane, la pynlong ïa ka jingïalang ha Conference Hall jong ka ophis u Deputy Commissioner na ka bynta ban iatai bad bishar bniah halor ki skhim sorkar pdeng kiba la pyntreikam hapo West Khasi Hills District. Ia ki jingtip kiba mih na kane ka jingialang, kan sa leit rah sha Delhi khnang ba yn lah ban wanrah shuh shuh ia ka roi ka par kaba myntoi ïa ki paidbah jong ka district.

Ka Myntri Sorkar Pdeng ka la kdew ruh ba ka Thain Shatei Lam Mihngih (North East India)ka dei ka thong ba kongsan tam jong ka Sorkar Pdeng hapoh ka jingïalam jong u Myntri Rangbah Duh ka Ri, u Narendra Modi. Ka la ong ba ka North East ka don bynta kaba khraw ha kaba iadei bad ki kam thaw aiñ bad ha ka saiñ pyrthei jong ka ri. La kheiñ ruh ïa kane ka thaiñ kum ka khyrdop ban rung sha South East Asia, bad ha kine ki 11 tylli ki snem ba la leit noh, la sakhi ïa ka jingkylla kaba khraw ha kiba bun ki liang kynthup ia ki surok, ka kamai kajih, bad kiwei pat. Ka Sorkar Pdeng ka kwah ban ïohi ba kane thaiñ kan nang kiew shaphrang bad wanrah jingmyntoi sha ka roi ka par jong ka ri baroh kawei. (DPRO, Nongstoin).