Phah sngewlem ki nongialam ki ri ka pyrthei Bthei ka liengsuin ba mut leit sha London, iap 200 ngut

Ka liengsuin Air India Boeing 787 Dreamliner (VT-ANB) kaba iaid na Ahmedabad sha London Gatwick, ka la bthei noh tang khyndiat minit ba la kiew ban her na kad liengsuin Sardar Bhai Patil Ahmedabad hynne ka sngi Palei ha ka por 1 baje eiei. Ka khubor ka iathuh ki don 242ngut ki briew ba shong ha katei ka liengsuin, kynthup 169 ngut na India, 53 ngut na Britain, 6 ngut na Portugal bad uwei na Canada bad shiphew ngut ki nongtrei lem bad 2 ngut ki pilot. Ha kane ka jingjia la suba kumba 200 ngut ki nongleit jingleit ki la iap na ka jingbthei ka liengsuin bad uwei u briew ula lait im, bad haduh ba thoh ia kane ka khubor ym pat ioh jingtip ba thikna katno kiba iap bad katno ngut kiba lait im. Ki bor ba dei peit ki la poi mar mar sha katei ka jaka ban iarap ia ki lanot ha katei ka jingjia.

Ha kane ka jingjia u Myntri rangbah barim ka Gujarat u Vijay Rupani ula iap lang ha kane ka jingjia. U Myntri Rangbahduh u Narendra Modi ula pynpaw ka jingsngewsih bad phah ka jingsngewlem sha kiba ieid ba thoiñ kiba shah khlad noh. Katba u myntri kam pohiing ka sorkar pdeng u Amit Shah ula poi sha katei ka jaka ba la hap ka liengsuin bad kyntu ia ki bor iarap ia ki lanot ha katei ka jingjia. Ki nongialam ki Ri ka pyrthei kynthup u Myntri Rangbahduh ka Australia u Anthony Albanese, U president ka Russia u Vladimir Putin, U President ka France, u Emmanuel Macron bad kiwei ki la phah ka jingsngewlem ha kiba haiing jong kito kiba la khlad noh bad duwai ba kiba mynsaw kin ioh ka jingkoit kham kloi.

Ka Tata Group ka la pynbna ba kin ai pisa 1 klur sha ki longïing jong uwei pa uwei u briew uba la duh noh ïa la ka jong ka jingim.Ha kane ka jingjia ka Air India ka la buh ruh ïa u nombar ba kyrpang na ka bynta ki nongleit nongwan, 1800 5691 444, ban ai jingtip kham bniah. La iathuh ki bor ba dei peit ki dang pynlong ka jingtohkit halor kane ka jingjia ban lap ia ka daw kaba pynlong ia katei jingjia ba sngewsih.