Rai ka Sorkar ban pynkhlain ia ka MRSSA 2016

Ka Sorkar Jylla ka la rai ban nang pynkhlain shuh shuh ia Meghalaya Residents, Safety and Security Act (MRSSA), 2016 ban tehlakam ia ka jingwan rung ki riew bymman sha Meghalaya. Ïa kane la pyntip da u Myntri ka tnat Tourism u Bah Paul Lyngdoh bad ula ong ba kane ka jingtyrwa ka long kongsan bha khamtam hadien ka jingshah pyniap uwei u nongwan kai na Indore, Madhya Pradesh ha Sohra. Haba kren sha ki lad pathai khubor u Bah Paul ula ong, “Ka kynhun Myntri ka la rai ban shong bishar biang ia ka MRSSA kaba dei ka Ain ka Jylla ba la don lypa bad ban nang pynkhlain shuh shuh haba khmih ia kaei kaba ngi dang shu mad mad ia ka jingjia ha Sohra, khnang ba kan pynthikna ban ngin lah pynduna katba lah ia ka jingwanrung ki riew bymman sha Meghalaya ha ka nam kum ki nongwan jngohkai”.

“Lada phi pule ia ka MRSSA, ki la don lypa shibun kiei kiei hynrei ngi donkam ban nang pynkhlain bad nang pynjanai ia kaei kaba ngi la don lypa ha ka MRSSA. Ka Sorkar kan sa wanrah shen ia ka jingtyrwa ban pynkhlain ia ka MRSSA” la ong u Bah Paul. Haba kylli halor ka jingslem ban ioh jingmyjur ban pyntreikam ia ka Inner Line Permit (ILP) ha Meghalaya, u Bah Paul u la ong ba kane ka kam ka dang sahkut bad ka Ministry of Home Affairs (MHA) ka Sorkar Pdeng.

“Haba iadei hi bad ka ILP, ai ba ngan pynkynmaw ia phi ba ka Iingdorbar Thaw Ain ka la dep mynjur ia ka Resolution. Kane ka kam kala sahkut bad ka MHA, kaba la buh shibun ki jingkylli, kaba ngi kum ka Sorkar Jylla ngi dang pyrshang ban leh eiei. Katto katne ki jingkylli ki iadei bad ka jingshisha ba ka Meghalaya ka dei ka lynti iaid sha kiwei pat ki Jylla ka thain Shatei Lam Mihngi kum ka Silchar bad ki Jylla kum ka Mizoram bad Tripura” la ong u Bah Paul.