Mynjur ka Sorkar ban thied 90 tylli ki Bos na ka CM-RCS

Ka Kynhun Myntri Sorkar hynne ka sngi ka la jingmynjur ban pyllait paidbah ia ka Chief Minister Regional Connectivity Scheme 2025 (CM-RCS). Ka CM-CRS ka dei ka skhim ban thied Bos da ka jingthmu ban pyniasoh ia baroh ki District, Block bad ki Headquarter bapher bapher hapoh ka Jylla.Haba pynbna ïa kane u Myntri ka tnat Tourism u Bah Paul Lyngdoh ula ong, “Hapoh ka skhim CM-RCS kin don 90 tylli ki Bos ki ban ai nyngkong ia ka jingshakri bad ka jingthmu ka long ban pynshlur ia ki nongsengkam lajong bad kawei na ki bynta ba kongsan ka scheme ka long ban pynthikna ba kine ki bos kin poi sha kylleng ki district headquarter hapoh ka por 9.30 mynstep bad ban mih ha ka por 5.30 janmiet ban pynbiang ia ka leit ka wan jong kito kiba leit ophis, ki samla pule, ki briew ba leit sha ki hospital bad ki briew kiba leit iew leit hat” u la ong.

U Bah Paul ula pyntip ba ka jingiarap pisa kan long haduh 50% na ka jinglut jingsep baroh ha ka jingthied ia ka bos. “Kan don ka jingnoh synniang na ka Sorkar ba long 35% na ka bynta ka jinglut ha ka ‘On Road’ kum ka ‘Down Payment’. U nongioh jingmyntoi yn noh synniang 5% ia ka Down Payment bad ka jingshim ia ka ram kan long 60% ia kaba lah ban siew haduh 5 snem da ki nongioh jingmyntoi”ula ong. U Bah Paul ula ong ba kane ka skhim ka dei ka sienjam ba khraw ba ka Sorkar ka sngewskhem ba kan weng ia ki jingduna bad kan pynkhlain ia ki lad pyniasoh ha kylleng ki thaiñ jong ka Jylla.

U Myntri ula ban jur ka scheme kan iarap ban pynshlur ia ka jingshakri jong ki bos namar ka jingktah ia ka jinglong jingman na ka jingdheng kali ha ki surok.“Ka dei na katei ka jingshem ba ka sorkar kam shym la don ia kano kano ka jingiadei hynrei lyngba ka jingshem ka jingpyniaid ka MTC ia ki bos, ki la kylla long ki jingduhnong tang hapoh katto katne por. Ngi mynta ngi la ioh jinghikai ban long kiba shemphang ban pynshlur ia ki nongseng kam ba dei ki riewshimet. Ki dei kiba biang bha bad kiba trei shitom bad ka rukom siew ka jong ki ruh ka long kaba kham biang shuh shuh” ula ong.