Plie u MLA ia ka jaka ieng ki kali Tourist ka JO&DTTA ha Anjali

U MLA ka Mawkynrew u bah Banteidor Lyngdoh hynne ka sngi u la plie ia ka jaka ieng ki kali kamai Tourist jong ka Jongksha Owner & Driver Tourist Taxi Association ha Anjali. Ka jingdon jong kane ka stand ieng kali, kan iarap ban kamai ban pynpoi ia ki paidbah sha ka jaka kaba ki kwah ban leit sha ka thain Mawkynrew bad kane kan long ruh ka kabu na bynta ki nongshangkai pyrthei kiba kwah ban leit peit ia ki jaka jngohkai kiba itynnad kiba don ha katei ka thain kum ka jaka sha Laitlum, Nongjrong, Syntung nalor kiwei de. Khnang ba ki paidbah kin ithuh ia ki draibar kiba kamai sha katei ka thain bad ban don jingshngain ki paidbah ha ka leit ka wan, ka Association ka la bthah ia ki nongkamai kali ba kidei ban phong da ka uniphom kaba Blue bad kidei ban deng ia ka kyrteng (Name Tag) bad kidei ban tah ia ki sticker ha ki kali jong ki.

U MLA ka Mawkynrew u bah Banteidor haba kren ha kane ka sngi, ula ong ba kane kadei ka jingangnud jong ki nongniah kali la bun bnai ban ioh noh la ka jong ka jaka ieng kali kaba biang, khnang ban kamai bad kan long kaba kabu ban ialam ia ki nongiawan jngohkai sha kane ka jylla. U bah Banteidor ula ong khnang ba ki paidbah kin tip bad kin shngain haba ki leit ki wan, la ai da ki Uniphom, ki ID bad shen kin sa bthah ba kin deng ruh ia Name Tag kiba don ia ka kyrteng jong ki. “Kane ka sienjam ban phong ia ki Uniphom bad ban don ia ki kyrteng kan wanrah ka jinglong ryntih bad kan long ka jingshngain ia ki paidbah kiba leit ba wan,”ula ong.

Na ka liang u Sordar u bah Olet Kharsahngoh ha kane ka sngi ula batai ia ki kyndon jong kane ka Assocition ha kaba baroh ki draibar kidei ban bud ryntih. Ki katto katne ki kyndon nalor ka jingphong ia ka uniphom, ki long ba kidei ban leh khuid ia ki kali bad ialade, kim bit ban dih duma ne kino kino ki jingdih ba sniew ha kaili, kim dei ban shim kabu ia ka dor bai kali, kidei ban long kiba don akor ha ka ktien ka thylliej, kim dei ban bret pathar ia ki plastic, bitor ne jaboh shabar bad kumjuh kidei ban bthah ia ki passenger bad kim dei ban bret ne pynjah ia ki tiar ki nongleit nongwan lada ki kum klet ha ki kali jong ki.