Ban aiti ia ka kaiphod ba pura halor ka jingshna ia ka surok Jowai-Rattacherra

Ka iingbishar Meghalaya High Court hynne ka sngi, ka la tian bishar halor ka jingshna ia ka surok Jowai-Ratacherra kaba 102.255 Km bad ka la ai por haduh ka 18 tarik u Nailar ban aiti ia ka kaiphod kaba pura halor ka jingshna pyndep ia kane ka surok. Haba tian bishar ia kane ka mukotduma, u Chief Justice ka Meghalaya High Court u Justice IP Mukerji bad u Nongbishar u Bah W Diengdoh kila pynpaw, ba la sdang ban shna pynbha ia katei ka surok ha u bnai Lber 2024 da ka NHAI bad la pynkhamti ha ki arngut ki Kontraktor kaba kynthup ia ka Purvanchal Buildtech Pvt. Ltd ban shna ia ka surok kaba 51 km na Jowai shaduh Wahiajer bad ka Dhar Construction Company ban shna ia ka surok kaba 51.255 km na Wahiajer shaduh Ratacherra.

Haba la bishar ia kane ka kam ha ka sien bishar kaba la dep, ha ka Sector kaba Nyngkong jongka 51 Km la dep ban shna 67 percent bad ha ka Sector ka Baar jongka 51.255 km 73 percent na ka kam la dep ban pyndep. Ha ka 16 tarik u Iaiong 2025 ka iingbishar kala shim ia kitei ki jingpynpaw bad kala buh ia ka tarik ban shong bishar ha kane ka sngi ban ai iaka kaiphod kaba la pyndep pura. Hynrei u Shoumen Sengupta, u nongiasaid uba la mihkhmat ia ka NHAI ula phah ia kawei ka kaiphod ha ka iingbishar hynne ka sngi bad la buh ha ka rekod ia ka bad ula pyntip ba ha ka 51 km sector, 75 percent jong ka kam la dep ban pyndep bad hakawei pat ka sector jongka 51.255 km, 80 per cent jongka kam la dep ban pyndep. Ula ong, namar ka jingbym ailad jong ka suinbneng ym shim la lah ban pyniaid shakhmat ia ka kam kumba la kular ha ka por ba la tian bishar ia kane ka kam bad ula kyrpad ban ai por shuh shuh ban aiti ia ka kaiphod kaba pura jong ka jingshna pyndep.

Ka iingbishar da kaba pdiang ia kane ka jingpynpaw bad da kaba shim ruh ba ka jinglong jingman jong ka suinbneng mynta, kumta kala ai por ia ka NHAI haduh ka 18 tarik u Nailar, 2025 ban aiti ia ka kaiphod kaba pura jong ka jingpyndep ia ka jingshna. Ka iingbishar kala bthah ruh ia u ‘Amicus Curiae’ ban khmih bniah ia ka jingpyntrei ia ka kam bad ban ai ia ka kaiphod na ka liang ka jongu bad lada donkam ha katei ka tarik kaba la buh. Ka iingbishar kan tian bishar biang ia kane ka kam ha ka 20 tarik u Nailar 2025.