Ki bym don Aadhar kin duh noh ki skhim pynroi na ka sorkar pdeng: Conrad

U Myntri Rangbah ka jylla u Conrad K Sangma ula ong ba napdeng ki jylla ha ka ri, dei tang ka jylla Meghalaya marwei ka bym pat dep ia u Adhaar.U Conrad ula pyntip ba ki briew ki bym don ia u Adhaar kin nym ioh shuh ia kano kano ka skhim shna iing ka PMAY ne ka skhim khaw rashon bad baroh ki skhim ka sorkar pdeng ruh kin nym ioh bynta shuh.“Nga kwah ban pyntip ba ha kylleng ka jylla ka ri, dei tang ka jylla Meghalaya marwei ka bym pat dep ban pyniasoh ia u Adhaar hynrei kiwei ki jylla baroh ki ladep lut,” ong u Conrad haba kren ha ka prokram ka CM Connect kaba long ha Mawkdok, jong ka Khatarshnong C&RD Block.

U Conrad ula ong ba la saw snem la iaid, ka sorkar India man u snem ka la ai lad ia ka jylla Meghalaya ban pyndep noh ia u Adhaar bad ka jingaipor khatduh jong ka sorkar India ia ka jylla kan kut noh ha ka 1 tarik Natung,2025.“Baroh ka ri ki la shim ia u Adhaar, ngi ruh ngi donkam ban leh. Ka sorkar India ka la buh por iangi ba ha shwa ka 1 tarik u Naitung,2025, kino kino ki briew ki bym don ia u Adhaar kin duh ia ki skhim ka sorkar pdeng kynthup naduh ka skhim shna iing ka PMAY ne u khaw rashon ruh,” ong u Conrad. U Myntri Rangbah ula ong,“La saw snem ka sorkar India, ka la ong iangi ba ngin pynsahngeh noh, hynrei namar ka jingkyrpad jong nga bad  ki Myntri sorkar, la ai por ia ka jylla man u snem, hynrei mynta ngi la poi ka por ba ka sorkar India kan nym pynjlan por shuh iangi.”

Ula ong ba wat kito kiba don kyrteng ha ka Census na bynta ban ioh ia u Khaw NFSA, lada kim leh ia u Adhaar yn nym ioh khaw shuh naduh ka 1 tarik Naitung, yn nym ioh ia kino kino ki jingmyntoi na ka skhim ka sorkar pdeng. Na ka liang u Conrad ula kyntu ia ki paidbah ba kidei ban leh noh ia u Adhaar bad kim dei ban sngap ia ka jingbatai ka jingpynsmiej kaban ialam bakla ia ki paidbah.