Mih ki paidbah da ki hajar ha Maikhuli, dawa pynkylla MoU bad pynphai ia ka Pung Dohkha

Da Palat hajar ngut ki nongshong ka shnong Maikhuli kawei na ki shnong kaba don ha khappud ka jylla Meghalaya bad Assam ha Ri Bhoi District, ki la mih paidbah ban iaid paidbah ban pyrshah jur ia ka jingshah knieh noh jong ki ia ka pung ri dohkha bad shah pynhap sha ka jylla Assam katkum ka Memorandum of Understanding (MoU) ba la iasoi hapdeng ki ar jylla katkum ka jingiakren pynbeit pud jong ka wat kaba nyngkong (Phase I). Ha kane ka jingiamih paidbah ba la pynlong biang da ki nongshong shnong ka Maikhuli, la lamkhmat hi da u Rangbah Shnong u Nicholas Marak, u Henitson Marak, Rangbah Shnong barim nalor kiwei kiwei ki nongialam shnong ha ryngkat ka kynhun ki khun samla bad ki longkmie longkpa kiba la rah da ki jingthoh bapher bapher ban pyrshah jur ia ka jingshah pynhap noh sha Assam ia katei ka pung ri dohkha.

Na ka liang kitei ki nongialam shnong ka Maikhuli, ki la pynpaw ia ka jingsngewkhia kaba jur halor ka jingshah pynhap syndet sha Assam ia katei ka pung ri dohkha kaba ki la ri la sumar la palat 50 snem tam bad kaba dei ruh kawei na ki lad ban pynmih ia ka ioh ka kot jong ka shnong hi baroh kawei khamtam ban pynbit pynbiang ia ka jingdonkam jong kawei ka shlem ai jingnang jingstad hapoh ka shnong. Ki la pynpaw ruh, ba ka shnong Maikhuli hapoh u pud u sam jong ka Ri Bhoi District ha Meghalaya, ka dei ka shnong kaba la rim tam hapoh ka jylla bad ki nongshong shnong ki long kita ki nongiada ia u pud u sam jong ka jylla Meghalaya na ka jingshah kyntur pud kaba ju jia man la ki snem ha katei ka thain, ki la pynpaw ruh, ba kum ki nongshong shnong ki dap ruh ia ka jingkmen ba la ioh jingithuh naduh u Myntri Rangbah ba nyngkong ka jylla Meghalaya u Late. Capt. Williamson Sangma bad ruh ki la ioh Shibun ki jingiarap na u Dr. D.D Lapang u ba la bat bunsien ia ka khet Myntri Rangbah ka jylla Meghalaya.

“Ngi dap da ka jingkmen kaba khraw ban tip ba ka jylla Meghalaya bad Assam ki la iaid shakhmat ban pynbeit noh pura ia u pud u sam ba tikna, hynrei ngim poi pyrkhat pat ba ka jaka kaba kum ka shnong ka long trai naduh ki phew snem mynshwa mar ia phiah jylla hapdeng ka Assam bad Meghalaya”, ong ki nongialam shnong da kaba bynrap ruh, ba kim lah ban pdiang ia kane da leilei ruh. Shuh shuh ruh, ki la pyntip ba ki la dep ban buh ia ki dorkhas sha u Myntri Rangbah ka jylla Meghalaya u Conrad K Sangma, Symbut Myntri Rangbah Bah Prestone Tynsong nalor ki bor pyniaid district ka Ri Bhoi District ban dawa pynkylla noh ia ka MoU ba la dep ia soi bad ka Assam ha kaba ia dei bad ka jingpynhap ia katei ka pung ri dohkha ka shnong Maikhuli sha Assam, bad da leilei ruh kin nym pdiang satia ia katei ka rai.