Rah ka Riwanka Pde ha ka iakop thoh Essay halor ka Behdeiñkhlam

Ka ophis treikam jong u Deputy Commissioner, West Jaiñtia Hills ha ka sien banyngkong ka la pynlong da ka jingiakob thoh Essay na ka bynta ki khynnah skul Upper Primary School haduh Higher Secondary School halor ka phang jong ka jinglehkmen “Behdieñkhlam Festival”, ia kaba la pynlong ha ka 10 tarik mynta  u bnai ha Kiang Nangbah Government Higher Secondary School, Mynthong, Jowai.  Kumta hynne ka sngi ka ophis u Deputy Commissioner kala sam khusnam shaki lai ngut ki nongjop ha kane ka jingiakop ba la pynlong ha Conference Room, DC ophis Jowai.

Ha kane ka jingsam khusnam la donlang u MLA ka Jowai, u Wailadmiki Shylla, u Deputy Commissioner, u Abhinav Kumar Singh, u F. Passah, Assistant Commissioner, u Dolloi ka Elaka Jowai, u Puramon Kynjing, u President ka Seiñraij Jowai, u H. Toi bad kiwei. Ki nongjop ha ka jingiakop banyngkong ka Riwanka Pde na Government Boys’ Higher Secondary School ka la rah buskit song pisa 10,000 tyngka, ba ar ka R. Passah na Kiang Nangbah Government Higher Secondary School ryngkat ka song pisa ba 7000 tyngka, ba lai ka Echwadaka Lamurong na St. Mary Mazzarello Girls’ Higher Secondary ryngkat ka song pisa ba 5000 tyngka.

U MLA Bah Wailadmiki Shylla ula ai khublei ia u DC bad ia ki briew jong u halor ka jingpynlong kum kane ka jingiakob ha ka sien banyngkong namar ba kane ka long kaba donkam kum shibynta ban pynpaw ia ka jingriewspah  ka rilum Jaiñtia ha ka riti dustur.  Ula ban jur ruh halor ka jingdonkam ban don da ka jingthoh shaphang ka dustur riti jong ngi, kumta ula pynshlur ban pynlong shuh  kum kine ki jait jingiakop bad u kmen ruh ban iohi iaka jingshim bynta shongshit ki khynnah bad ai khublei ruh ia baroh kiba shim bynta.