Ai jingbit ka High Court ryngkat ki kyndon ia ki nongleit Yatra ha krem Mawjymbuin

Ka Meghalaya High Court ka la ai jingbit ia ki nongleit pilgrim ban leit ha krem Mawjymbuin, ka jaka ba la niew kyntang naduh ki tymmen hyndai ha Mawsynram, East Khasi Hills district ryngkat ki kyndon ban pynthikna ia ka shongsuk, ka jingiaid beit iaid ryntih bad ka burom ba khraw tam ia ki trai shnong kiba la sumar bad pynneh ia katei ka jaka naduh mynshwa haduh mynta. Ka ben ba marwei jong u Justice H.S Thangkhiew ha ka sngi Thohdieng ka la mynjur ia katei ka hukum hadien ka jingujor ban pynsuk ia ka jingleit jingwan sha katei ka krem ba ki nongmudui ki shim ba ka long ka jaka ba kyntang. Ha ka jingbishar baroh kiba don bynta ki la mynjur ban ai jingiada ia ka jingiaid Yatra ba ju pynlong man u snem. Katkum ka hukum ka Iingbishar la mana ban ym shah ia ki nongleit kai ban leh kano kano ka jingleh niam ha katei ka krem lane wanrah ia ki tiar nabar bad kiwei na bynta ka jingleh niam. La mana ban theh um halor u maw kyntang hapoh ka krem.

Ka Iingbishar ka bthah ia ki bor pyniaid district ba kin peitngor ia ka jingiaid Yatra ba kan iaid beit iaid ryntih. Nalor kata la bthah ia ki nongpynïaid ban buh nongap pahara ban lait ka jingthud ka leit ka wan ka wan ki paidbah. Ka iingbishar ka la ban jur ka jingleit ka dei ban long kaba don burom ia ki trai shnong, khlem da pynthut ia ka leit ka wan ne pynjaboh. Ka Dorbar Shnong Mawsynram ka la ai ia ka Undertaking ban kyrshan ban pynlong ia ka Yatra hapoh ki kyndon ba la buh.

Ia kane ka kam la buh kyrteng ban bishar biang ha ka 31 tarik Naitung ha kaba arliang kin rai bad pyntip ia ka tarik ban pynlong ia ka yatra sha ki bor synshar district. Kum ban pynpaw kane ka mat ka dei kawei kaba la pynkhih win ia ka thain Mawsynram ha ki snem ba la dep na ka jingwan ki briew ki briew na shabar ban jngoh ia katei ka krem Mawjymbui ryngkat ka jingthmu ban leh niam.