Donkam ka jingiatreilang bad rat dyngkhong ïa u drok

U Myntri Sorkar u Bah Kyrmen Shylla hynne ka sngi ula ong ba ka jingjyllei u drok hapoh ka jylla kadei ka mat kaba baroh ki nongmihkhmat jong ka Jylla ki sngewkhia namar u drok u la pynjot ïa bun ngut ki samla.

Haba kren sha ki lad pathai khubor, u Bah Kyrmen Shylla u la ong “Haba phai sha u drok kane ka dei ka mat kaba sngewkhia ym tang ha ka jylla wat ha ka ri bad ka pyrthei baroh kawei, ngi la ïohi ba bunsien ki samla ki la long ka jingma jong une u drok ha kaba u drok u pyrshang ban wad ïa ki lad ki lynti ban ïakhun pyrshah bad ban poi sha ki samla ka jylla jong ngi bad nangta ban pynjot ïa ka kamai kajih.”

U Bah Kyrmen u la ong ba kane kadei ka mat ha kaba ym tang ka jingsngewkhia jong uwei u briew hynrei baroh ki sngewkhia namar tad haduh ba lymda baroh ki ïawan lang ban kyrshan bad snohkti lang kan long ka kam kaba eh bha ban ïakhun pyrshah ïa u drok namar ka long kaba eh bha ban lap ia ki nongdih bad nangta ban tip mano ba dei ki nongdih.

“Hynrei na ka bynta kine kiei kiei baroh, nga kwah ban pynpaw ba ka sorkar la ka long naduh ka tnad pulit, ka tnad ka koit ka khiah bad bun ki tnad kiba ïatreilang ban ïakhun pyrshah ïa u drok bad ka jingma jong u drok hynrei kumba nga la kdew ka long kaba ym lah ban leh lada baroh ngim mih lang ban kyrshan,” bynrap biang u Myntri.

U Bah Kyrmen u la ong ruh, “Nga kwah ruh ban ai khublei kyrpang bad sngewnguh ia ki Dorbar Shnong jong ki shnong bapher bapher, nga la iohi na ka por sha ka por ba ki kyrshan shisha bad ki pyrshang ban wad ki lad ki lynti kumno ban iarap ia ki khun ki kti jong ngi, ki samla jong ngi ba kin ym ngop ha u drok.”

U ong ruh ba kum ka nuksa, na ka por sha ka por u ju iohi ia ki MLA kiba ju noh synniang na ka bynta ki kam ialehkai jong ki samla. Kane ruh katkum ka jingong jong u Bah Kyrmen kadei shi bynta ban pyllait ia ki na ka jingshah pynngop ha u drok namar ha ka jaka ba kin byrngia ha kitei ki kam ki la lap miet noh ha ki kam ialehkai.