Pynlong ka ophis DMHO ia ka ‘Diarrhoea Campaign’ ban iada ia ki khynnah

Ka District Medical & Health Officer office, East Khasi Hills ka la sdang ia ka District Level Stop Diarrhoea Campaign 2025 ha Laitlyngkot PHC da ka jingthmu ban pynduna ia ka jingiap ki heprit kiba hapoh 5 snem ka rta. Ia kane ka jingialang la pynlong ha ka 18 tarik u Naitung ia kaba la wan ban iadonlang u MLA ka Sohra u Bah Gavin M Mylliem kum u kongsan ha kaba la donlang Dr. J. Nongrum Paeditrician jong ka Sohra CHC, District Medical & Health Officer Dr. A Kharduit. U MLA ula aiti ruh ia ka Ambulance ne kali kit nongpang sha ka Laitlyngkot PHC bad hadien pat la pynlong ia ka Blood Donation Camp. Haba kren ha ka jingialang u Bah Gavin M Mylliem, ula kdew ba 8% jong ka jingbhah tyngka baroh jong ka Meghalaya ka dei kaba la mang na ka bynta ka koit ka khiah kumba ka sorkar ka buh hakhmat eh.

Ula pynkynmaw ba ka tnad ka koit ka khiah ka la pynlong ia ki jingpynsngew thuh paidbah ne ki Health Awareness na ka por sha ka por bad ula kyntu ia baroh kiba la wan sha kane ka jingialang ba kin pynsaphriang lem ia ka khubor kaba kila ioh pdiang sha ki bahaiing bahasem ki jongki bad sha kiwei pat khnang ba kane ka prokram kan long kaba seisoh bad kaban lah ban kyntiew ia ka koit ka khiah jong ki paidbah kane ka thain. Ula kyntu ruh ia ki nongialam shnong ba kin pyniasoh ia u Aadhaar card u jong ki bad ka MHIS khnang ba kin lah ban ioh ia kiba bun ki jingmyntoi haba ki leit ban phah sumar ha ki hospital bad ula ai khublei ia ki doctor, nurse, aganwadi, ANM bad ia baroh ki nongtrei ka koit ka khiah ba wat hapdeng ka jingmad ia ki jingeh bad jingtynjuh hynrei kila bteng ban trei shitom ban kyntiew ia ka rukom long jong ka koit ka khiah hapoh ka jylla. Ka Dr. J. Nongrum, ka la pynsngewthuh shaphang ki daw, ki dak ki shin bad ka rukom sumar ia ka jingpang pynhiar ne Diarrhoea bad ka la ban jur ba ka long kaba kongsan ban shim ia ki lad jingiada ba kynthup ban sait ia ki kti ban long kiba lehkhuid bad ban pyndonkam ia u ORS bad Zinc ban iakhun pyrshah ia ka Diarrhoea.

Ka la ban jur ruh ia ka jingkongsan ba ka kmie kan ai dud bha ia la ki khun bad ban bam ia ki jingbam kiba tei, ki ban lah ban iarap ban iada ia ki khynnah na ka Diarrhoea bad kiwei kiwei ki jingpang. Katba ka District Medical & Health Officer ka la ban jur ia ka jingkongsan ban leit phah ai injek bad shim ia ki dawai tika ia ki khynnah namar kan iarap shibun ban ai jingiada na ki jingpang, ka jingduna ha ka dkhot met bad na ka jingiap bad ka la pynpaw ruh ba ka long kaba kongsan bha ban leit ban phah khmih bniah man la ka por ia ki khunlung khynnah khnang ba yn lap mardor ia ki jingpang bad ban lah ban ai jingsumar.