Na u QR Code kyrmen ka tnat ban ïoh lum palat T.500 klur

U Myntri ka tnat Excise u Bah Kyrmen Shylla ula ong ba ka tnat ka khmih lynti ba ka jingioh lum khajna kan palat ia ka T.500 klur hadien ba la pyntreikam ia ka QR Code system bad ka Integrated Excise Management System (IEMS). Haba kren sha ki lad pathai khubor u Bah Kyrmen ula ong “Ngi khmih lynti ba kan palat ia ka T.500 klur hynrei hadien ba la pyndep ia ka IEMS bad ka QR Code. Ngi khmih lynti ba ka jingkylla haka rukom mih khajna bad ka rukom hapoh ka tnat kan nym kylla kynsan kynsan hynrei hadien shisnem ne ar snem, kan don ka jingkylla kaba khraw.”

U Bah Kyrmen ula pynbna ruh ba ka jingpyntreikam ia ka QR Code tracking ia ki bilor kyiad ka dang iaid shakhmat bad la khmih lynti ba yn pyndep shwa lane haka 15 tarik Nailar. “Ka jingpyntreikam da QR Code System kan buddien ia ki kyiad naduh ka jaka shna haduh ki dukan ba die haduh da thied ki briew ban pynthikna ia ka jingbha bad jinglong shisha jong ki mar ba die” ula ong.

Haba iadei bad ki jingdon bun ki dukan die kyiad ha ki katto katne ki jaka, u Myntri ula pyntip ba ka Sorkar ka la sangeh shipor ban ai laisen ban pule bniah ia ka jingdon palat ki dukan kyiad ha ki katto katne ki jaka bad kan sa rai ban wanrah ia ki dukan thymmai katkum ki jingtip ba la lum lyngba ka IEMS. Ha kaba iadei bad ki laisen thymmai, u Myntri u la pynpaw ba lah ban ai laisen thymmai ha ki jaka ba ym pat don ki dukan kyiad tang hadien bala ioh NOC na u Rangbah Shnong.”Da kaba pynshong nongrim ha ka kaiphod bad ka jingujor ba ki don bun palat ki dukan die kyiad ha kawei ka jaka, kumta ban ïakhun ïa kata ngi pynsangeh noh shipor ban ai License” ula ong.