Ka Khyndai Lad ka lynti iaid kjat, ym shah iaid kali naduh 7 baje AM haduh 9 PM

Ka Sorkar Jylla hynne ka sngi kala pynbna ba iaka Khyndai Lad la khien kum ka lynti iaid kjat (Pedestrian Zone) naduh ka por 7 baje mynstep haduh 9 baje janmiet. Ka bynta jong ka lynti iaid kjat (Pedestrian Zone) kan dei na Traffic Point (Centre Point) haduh Lad Umsohsun. Ia kane ka rai la shim haka jingialang bala pyniaid da u Symbud Myntri Rangbah ka Jylla ba khmih iaka tnat pynroi sor u Bah Sniawbhalang Dhar haka jingdonlang u Myntri ka tnat Tourism u Bah Paul Lyngdoh.Haba kren shaki lad pathai khubor u Bah Paul Lyngdoh ula ong “Kaba kham kongsan ka long ba ngi la rai ba ka jingpynkylla jaka iaid kjat kan sdang noh mar mar bad ka pork an long naduh 7 baje mynstep haduh 9 baje mynmiet bad kan ym don satia kano kano ka jingiaid kali (naduh ka lad ban rung sha Khyndailad haduh Umsohsun) lait noh tang ki kali kiba la ioh ia ki pass ki ban ai tang sha kito kiba leit buh skul ia ki khynnah ha ka por long skul. Hynrei ha ki sngi shuthi, yn ym shah shuh ban iaid kali lait noh tang ha ki khep kiba kyrkieh ne ki jingjia ki bym lah ban batai lypa kum ka jingpluh ding bad ka pang ka shitom” la ong u Bah Paul.

U Bah Paul ula ïathuh ba shen ka Shillong Municipal Board kan sa ai ia ki Pass sha ki nong shong shnong jong ka thaiñ Khyndai Lad, ka ban shah ia ki ba kin leit ki wan shala iing ha ki kynta ba buh tang ban iaid kjat ki paidbah. Haka jingialang, la rai ruh ban pynbit pynbiang iaki jingdonkam naka bynta ki nongdie jingdie madan kata daka pynniang ka um bad ban tei thymmai 15 tylli ki jaka leit shabar (Toilet) ha khrum ka MUDA Parking Lot Khyndai Lad.

U Myntri ula pynpaw ruh ba ka Sorkar ka kmen palat ba ka Iingkashari Meghalaya High Court kala pynpaw ia ka jingsngewhun halor ka rukom pyniaid ka Sorkar Jylla haba iadei bad ka jingpynkynriah ia ki dukan madan bad pynthikna ia ka jaka kaba heh bad kylluid ia baroh ki nongpyndonkam ia ki surok bad khamtam ki nongiaid kjat ha kane ka jaka iew ba thnem eh ka sor. Ula pynbna ruh ba u Symbud Myntri Rangbah bad ma u, kin sa aiti dalade ia ki cheque ba T.10,000 sha man ki nongshongdukan madan ha ka 5 tarik Nailar.